रायपुर, 16 मई 2021। प्रधानमंत्री श्री नरेन्द्र मोदी ह आज दूरभाष म छत्तीसगढ़ के मुख्यमंत्री श्री भूपेश बघेल ले प्रदेश म कोविड-19 के संबंध म विस्तृत चर्चा करिन। मुख्यमंत्री श्री भूपेश बघले ह प्रधानमंत्री ले कहिन के कोरोना संक्रमण के रोकथाम बर ऊंखर अऊ केन्द्र सरकार कोति ले समय-समय म जारी दिशा-निर्देश मन के छत्तीसगढ़ म पूरा पालन करे जात हे। राज्य म टेस्टिंग के संख्या म बढ़ोतरी करे गए हे अऊ ट्रेसिंग म घलोक तेजी आए हे। पॉजिटिविटी दर म निरंतर कमी आवत हे, मरीज मन के संख्या घटत हे। प्रदेश के ग्रामीण क्षेत्र मन म विशेष ध्यान देहे जात हे। जेन इलाका मन म अभी तक केस बाढ़त रहिस उहां अकतहा टीम लगाए गए हे।
मुख्यमंत्री ह प्रधानमंत्री ल ये घलोक बताईन के प्रदेश म शासकीय अऊ निजी कोविड अस्पताल अऊ केयर सेंटर मन के बेड मन के पूरा जानकारी ल आनलाईन करे गए हे ताकि मनखे आसानी ले एकर लाभ ले सकयं। मुख्यमंत्री श्री बघेल ह प्रधानमंत्री के राज्य म वैक्सीनेशन के कमी कोति ध्यान आकृष्ट करत बहुत मात्रा म वैक्सीन उपलब्ध कराए के अनुरोध करिन संगेच उमन प्रधानमंत्री ले ये घलोक अनुरोध करिन के काबर के अभी हाल म आक्सीजन के बहुत मात्रा उपलब्ध हे जेखर सेती 80 प्रतिशत अस्पताल मन ल अऊ 20 प्रतिशत छोटे-मोटे उद्योग मन ल उपलब्ध कराए के मंजूरी देहे जाय ताकि ये उद्योग घलोक अपन काम चालू कर सकयं। प्रधानमंत्री श्री नरेन्द्र मोदी ह मुख्यमंत्री श्री भूपेश बघेल के ये दूनो मांग उपर सहानुभूति पूर्वक विचार करे के आश्वासन देहे हें।
प्रधानमंत्री ह कोविड-19 के संबंध म मुख्यमंत्री ले दूरभाष म करिन गोठ-बात
