स्कूल के जम्मो गुरूजी मन करत हे नवाचारी काम
सूरजपुर, 13 जुलाई 2021। ग्राम पंचायत सुंदरगंज के सरकारी प्राथमिक शाला म स्कूल के जम्मो गुरूजी मन मोहल्ला क्लास के नियमित संचालन करत हें। मोहल्ला क्लास खुले ले अभिभावक मन म बहुत हर्ष व्याप्त हे। ये महामारी म घलोक लइका मन ल शिक्षा के मुख्य धारा ले जोड़े रखे बर काम होवत हे। स्कूल म पढ़ईया लइका मन ल उंखर सुविधा मुताबिक सुंदरगंज के तीन पारा म मोहल्ला क्लास के संचालन नियमित रूप ले 1 जुलाई ले चालू कर देहे गए हे।
जानबा हे के स्कूल म पदस्थ प्रभारी प्रधान पाठक दिनेश साहू ह सरलग उदीम करके स्कूल ल ल डिजिटल स्मार्ट बनाए के संगें-संग स्कूल ल हरा-भरा बनाए रखे बर हर बछर वृक्षारोपण के काम करवाथे अऊ पौधा मन के देखरेख घलोक सबे गुरूजी मन करथें। स्कूल म करीबन 1000 ले जादा पेड़ पौधा लगे हे। स्कूल म मोहल्ला क्लास संचालन के संगे संग किचन गार्डन के काम घलोक करे जात हे।
इहां मोहल्ला क्लास के संगे संग ऑनलाइन माध्यम ले घलोक लइका मन ल जोड़के नियमित पढ़ई कराया जात हे। स्कूल के गुरूजी मन शासन के योजना के मुताबिक स्कूली छात्र छात्रा मन ल सूखा राशन अऊ पुस्तक तको बांटत हें। मोहल्ला क्लास के नियमित संचालन ले लइका मन के उपस्थिति घलोक बढ़त जात हे, एखर बर स्कूल के प्रधान पाठक के संगें-संग गुरूजी शैलेंद्र कुमार सिंह, मनोज कुमार अऊ पूजा सिंह ह नवा नवा नवाचार गतिविधि, गीत कविता, कई प्रकार के सहायक सामान के उपयोग करके मोहल्ला क्लास ल रुचिकर बनाए के काम करत हें, जेखर से स्कूल के दर्ज संख्या लगातार बाढ़त हे।
प्राथमिक शाला सुंदरगंज म मोहल्ला क्लास के संग ऑनलाइन होवत हे पढ़ई
