- सबसे जादा वर्चुअल कक्षा म सामिल होवइया छात्र
- स्कूल शिक्षा विभाग के वेब पोर्टल ह दीस ”हमारे नायक” सम्मान
सुकमा, 26 अगस्त 2020। पढ़ई तुंहर दुआर योजना के अंतर्गत हमारे नायक म जगा बना के जिला के छात्र मोहित खरे ह मान बढ़ाए हे। कोरोना महामारी के सेती स्कूल बंद हे, अइसन समय म लइका मन ल पढ़ाई ले जोड़े रखे बर स्कूल शिक्षा विभाग ह ‘पढ़ई तुंहर दुआर योजना’ ले के आए हे। ये योजना के माध्यम ले लइका मन वर्चुअल क्लास ले सुरक्षित रूप म अपन घर म रहिके पढ़ाई करत हें। ये योजना के अंतर्गत स्कूल शिक्षा विभाग ह अपन अधिकारिक वेब पेज म हमारे नायक नाम ले श्रृंखला चालू करे हे। हमारे नायक म पूरा राज्य ले वो शिक्षक अऊ छात्र मन ल जगा देहे जाथे जेमन पढ़ई तुंहर दुआर योजना म उल्लेखनीय उपलब्धि हासिल करे रहिथें। एखर तहत कोन्टा ब्लॉक के शासकीय उच्चतर माध्यमिक शाला दोरनापाल के छात्र मोहित खरे ह पूरा जिला म सबले जादा ऑनलाइन क्लास अटेंड करइया विद्यार्थी के रूप म हमारे नायक म जगा बनाए म कामयाब रहे हे। मोहित के ये कामयाबी म शिक्षक मन के संग वोखर पिता अंजोर सिंह खरे अऊ माता श्रीमती दामिनी खरे के महत्वपूर्ण योगदान हे। मोहित के बताती पढ़ई तुंहर दुआर के ऑनलाइन क्लास ले ओ ल बहुत लाभ होय हे अऊ ओला पूरा राज्य के शिक्षक मन ले सीखे के मौका मिले हे।
उद्योग अऊ वाणिज्य मंत्री श्री कवासी लखमा ह छात्र मोहित के उज्ज्वल भविष्य के कामना करत कहिन के सुदूर वनांचल के छात्र के चयन राज्य स्तर म ”हमारे नायक” के रूप म होए म निश्चित रूप ले सुकमा जिला के मान पूरा राज्य म बाढ़े हे। आज जब पूरा विश्व कोविड-19 महामारी ले जूझत हे अऊ करीबन सबो प्रकार के शिक्षण संस्था मन म पारम्परिक शिक्षण गतिविधि म विराम लगे हे, ए विषम परिस्थिति मन ले छत्तीसगढ़ शासन के वैकल्पिक ऑनलाइन शिक्षण योजना ”पढ़ई तुंहर दुआर” नित नवा इबारत लिखत हे। शासन के ये योजना ले राज्य के कई क्षेत्र मन के लइका लाभान्वित होके अपन पढ़ाई ल जारी रखत हें उहें कुछ छात्र अपन उल्लेखनीय सहभागिता ले आन पढ़ईया लईका मन ल प्रेरित घलोक करत हें।
