आरती नेताम खातिर महतारी वंदन योजना बनिस भरोसा, मिलत हे सरलग मदद

CHHATTISGARHI NEWS: मोहला-मानपुर-अम्बागढ़ चौकी जिला के विकासखंड मोहला के नाड़ेकल गांव के श्रीमती आरती नेताम छत्तीसगढ़ शासन के महतारी वंदन योजना के लाभ लेके अपन परिवार के जरूरत ल सुग्घर ढंग ले पूरा करत हावय। ये योजना ग्रामीण महतारी मन ल आर्थिक रूप ले सशक्त अउ आत्मनिर्भर बनाए के दिशा म मजबूत सहारा साबित होत हावय।
महतारी वंदन योजना के तहत श्रीमती आरती नेताम ल हर महीना एक हजार रूपिया के आर्थिक सहायता नियमित रूप ले मिलत हवय। आरती के कहना हवय के हर महीना मिलइया ये पइसा ओखर बर खाली आर्थिक मदद भर नोहय, बल्कि अपन जरूरत मन ल अपन आप पूरा करे के बड़का भरोसा हवय। ये पइसा के उपयोग ओ ह घर-परिवार के जरूरत ल पूरा करे म करथे, जेकर से ओ ल घर के खरचा चलाए म बहुत सहूलियत मिलत हे।
ग्रामीण अंचल के महतारी मन बर ये पइसा बहुत उपयोगी साबित होत हावय। एखर से महतारी मन के छोट-मोट जरूरत बर दूसर मन के ऊपर निर्भरता कम होत हवय अउ उंखर आत्मविश्वास घलो सरलग बाढ़त हावय। सेवा संकल्प अभियान के माध्यम से शासन के योजना मन के जानकारी गांव-गांव तक पहुँचत हावय, जेकर सहारे पात्र महतारी मन ल एखर लाभ सहजता ले मिलत हावय।
योजना के लाभ मिले म श्रीमती आरती नेताम ह प्रधानमंत्री नरेंद्र मोदी अउ मुख्यमंत्री विष्णु देव साय के हिरदे ले आभार व्यक्त करत हावय। ओखर मानना हवय के ये नियमित आर्थिक सहायता परिवार के सहयोग करे के संगे-संग महतारी मन म आर्थिक स्वावलंबन अउ आत्मसम्मान के भावना ल घलो मजबूत करत हावय।