प्राथमिक स्वास्थ्य केंद्र दनगढ़, आयुष्मान आरोग्य मंदिर चिखली अऊ केवटटोला सामिल
मोहला-मानपुर-अंबागढ़ चौकी, जिला ह स्वास्थ्य सेवा के क्षेत्र म बड़का उपलब्धि हासिल करत राष्ट्रीय स्तर म अपन पहिचान बनाय हे। जिला के दुर्गम अऊ आदिवासी इलाका मन म स्थित प्राथमिक स्वास्थ्य केंद्र दनगढ़, आयुष्मान आरोग्य मंदिर चिखली अऊ केवटटोला ल भारत सरकार के स्वास्थ्य अऊ परिवार कल्याण मंत्रालय डहर ले राष्ट्रीय गुणवत्ता आश्वासन मानक (NQAS) प्रमाण पत्र देहे गे हे।
भौगोलिक रूप ले कठिन इलाका होय के बाद घलो ए स्वास्थ्य केंद्र मन ह सेवा के गुणवत्ता, मरीज के अधिकार, संक्रमण रोकथाम, साफ-सफाई, बायोमेडिकल वेस्ट प्रबंधन समेत 7 राष्ट्रीय मानक (पैमाना) म 70 ले जादा नंबर (अंक) पा के ए साबित कर देहे हे के समर्पण अऊ बने कोशिश ले गुणवत्ता वाला स्वास्थ्य सेवा पक्का करे जा सकत हे।
मुख्य चिकित्सा अऊ स्वास्थ्य अधिकारी डॉ. विजय खोब्रागडे ह बताइन के ए सफलता के पाछू जिला प्रशासन अऊ स्वास्थ्य विभाग डहर ले तियार करे गे खास कार्ययोजना, लगातार देखरेख, नियमित समीक्षा अऊ मरीज मन ल ध्यान म रखे के सोच के बड़का भूमिका रहे हे। स्वास्थ्य संस्थान मन म मरीज मन ल बढ़िया इलाज के संगे-संग ओ मन के अधिकार अऊ सम्मान वाला व्यवहार ऊपर खास धियान देहे गे रहिस।
कलेक्टर श्रीमती तुलिका प्रजापति ह जिला के ए उपलब्धि ऊपर कहिन के ए सफलता लगातार कोशिश, टीम भावना अऊ मजबूत इच्छाशक्ति के नतीजा हरे। ओ मन कहिन के प्रशासन के प्राथमिकता शिक्षा अऊ स्वास्थ्य के माध्यम ले जिला के पूरा विकास ल गति देना हे अऊ आघू जिला के आने स्वास्थ्य संस्थान मन ल घलो राष्ट्रीय मानक के हिसाब ले विकसित करे जाही।
