विदेश यात्रा ले लहुटे नागरिक मन के होवत हे निगरानी, अब तक कोनो नागरिक म नइ पाए गए हे कोरोना के संक्रमण

दुर्ग, 20 मार्च 2020। जिला म कोरोना वायरस के संक्रमण के रोकथाम बर विदेश यात्रा ले वापस आये नागरिक मन के चिन्हांरी करके कोरोना वायरस के संक्रमण के जांच करे जात हे। 20 मार्च तक विदेश यात्रा ले आये 155 यात्री मन के जानकारी मिले हे। एमां ले 26 मनखे अभी हाल म जिला म निवासरत नइ हे। एमां ले 45 नागरिक मन ह होम आइसोलेशन के 14 दिन के अनिवार्य अवधि पूरा कर लेहे हें। 84 मनखे अभी हाल म होम आइसोलेशन/क्वारन्टीन म हें। विदेश ले आये नागरिक मन म केवल 15 मनखे म सर्दी-खांसी के सामान्य लक्षण मिले हे, जेखर परिप्रेक्ष्य म सबो के सैंपल जांच बर लैब भेजे गए हे। एमां ले 10 के रिपोट निगेटिव मिले हे अउ 5 नागरिक मन के रिपोट अवइया 12 घंटा म मिल जाही। ये प्रकार ले अभी हाल म कोरोना वायरस के संक्रमण ले ग्रस्त कोनो मनखे के चिन्हांकन म नइ आए हे।

कहूं कोनो मनखे विदेश यात्रा ले वापस आए हे या कोनो मनखे अइसन यात्री के संपर्क म रहे हे त ऊंखर बर 14 दिन के होम आइसोलेशन/क्वारन्टीन अनिवार्य हे। अइसन मनखे घर ले झन निकलय न ही कोनो से मिलय जुलय। अइसन मनखे टोल फ्री नंबर 104 म तुरंते जानकारी देवव, ताकि स्वास्थ्य विभाग के टीम घर पहुंचके एहतियात संबंधी जरूरी कार्रवाई कर सकय। ये संबंध म कोनो प्रकार के सूचना नगरीय निकाय के निदान के टोल फ्री नंबर 1100 म घलोक देहे जा सकत हे।

कलेक्टर श्री अंकित आनंद ह नागरिक मन ले अपील करे हें कि कम से कम घर ले बाहिर निकलव। संगेच ये संबंध म स्वास्थ्य विभाग कोति ले जारी करे गए मार्गदर्शन के पूरा पालन करव, ताकि एखर संक्रमण ले बचे जा सकय।