छत्तीसगढ़ म मंकीपॉक्स के संदिग्ध मरीज के टेस्ट रिपोट आईस निगेटिव

रायपुर, छत्तीसगढ़ म मंकीपॉक्स के संदिग्ध मरीज के जांच रिपोट निगेटिव आए हे। नेशनल इंस्टीयूट ऑफ वॉयरोलॉजी (NIV) लैब ले सनिच्‍चर के ओखर रिपोट आ गे। ओखर शरीर म परे दाना के मुरझा जाय के बाद ओला अस्पताल ले छुट्‌टी दे हे गीस। जानबा हे के ये 13 साल के लइका ल पांच दिन पहिली रायपुर के डॉ. भीमराव आम्बेडकर अस्पताल के आइसोलेशन वार्ड म भर्ती कराए गए रहिस। स्वास्थ्य मंत्री टीएस सिंहदेव ह बताइस, मंकीपॉक्स के संदेहास्पद मरीज के जांच IV पुणे ले कराए गीस। उपचार के बाद अब वो स्वस्थ हो गए हे। ये बेरा म मंत्री सिंहदेव ह कहिस के ये बने बात हे कि छत्तीसगढ़ अभी ये बीमारी ले अछूता हे, फेर हम सब ल एहतियात बरते के जरूरत हे। सबो ले अनुरोध हे कि बीमारी के कोनो लक्षण दिखे ख पता चले म म नज़दीकी अस्पताल म संपर्क करव अऊ गम्भीरता से एखर जांच करवाव।