सैलानी मन बर मानसून ट्रैकिंग के विशेष आयोजन
जगदलपुर, मानसून आतेच छत्तीसगढ़ राज्य के बस्तर जिला के प्राकृतिक नजारा देखतेच बनथे। इहां प्रकृति अपन सबले सुन्दर रूप म नजर आथे। हरियाली, झरना अऊ जंगल मन के माहौल दिल ल खुश कर देथे। ए मौसम म आप मन परिवार अऊ संगी मन के संग बाहिर घूमे-फिरे के संग बस्तर के प्राकृतिक सौंदर्य के आनंद ले सकत हव।
बस्तर म पर्यटन ल बढ़ावा देहे बर जिला प्रशासन कोति ले मानसून ट्रैक के थीम म कार्यक्रम आयोजित करे जात हे। एखर बर मानसून के मौसम म प्राकृतिक सौंदर्य वाले जगा मन म ट्रैकिंग के आयोजन करे जात हे। मानसून ट्रैक प्लान (Monsoon Track Plan) के तहत जिला के झरना अऊ जंगल-पहाड़ जइसे दर्शनीय स्थल मन म (जेन पर्यटक मन ल आकर्षित करथें उहां) प्रशिक्षित स्थानीय गाइड मन के माध्यम ले भ्रमण करवाए जाही।
कहूं आप मन वीकेंड म कहूं घूमे के प्लान बनावत हव, त बस्तर जिला के प्राकृतिक जलप्रपात चित्रकोट, तीरथगढ़, चित्रधारा, मेंदरीघूमर, तामड़ाघूमर, बीजाकसा, मिचनार ये जगा न सिरिफ प्राकृतिक खूबसूरती ले भरपूर हे, बल्कि इहां मानसून ट्रैक अऊ फोटोग्राफी बर घलोक बेहतरीन माहौल हे।
बस्तर जिला म पर्यटक मन ल आए बर विशाखापट्टनम ले रोजेच रेल सेवा संचालित हे। संगेच विमान सेवा के तहत हैदराबाद ले रोजे, दिल्ली ले हफ्ता म दू दिन के विमान सेवा उपलब्ध हे। एखर अलावा जगदलपुर सड़क मार्ग ले रायपुर, बिलासपुर, अंबिकापुर संग हैदराबाद, विशाखापट्टनम ले नियमित बस के सुविधा घलोक हे। प्रशासन कोति ले मानसून ट्रैक कार्यक्रम ल अन एक्सप्लोर्ड बस्तर (Unexplored Bastar) के संग मिलके करे जात हे। मानसून ट्रैक के संबंध म जानकारी बर प्रशासन ह 9109188567 अऊ 8962991988 संपर्क नंबर जारी करे हे।
मानसून ट्रैक म चिन्हाकित जगा मन के तहत चित्रकोट सर्किट म ट्रैकिंग बर चित्रकोट दंडामी रिसॉर्ट (Chitrakote Dandami Resort) ले चालू करके करबहार (मिनी गोआ) 2 किलोमीटर के दूरी म बोटिंग, वाटरफाल, शिवलिंग के दर्शन, जलप्रपात के ऊपर ले नजारा देखाय जाही। संगे मेंदरी घुमर ले इंद्रावती नदी तक 3 किलोमीटर के ट्रैक म रिवर क्रासिंग जंगली इलाका म, मेंदरीघुमर ले तामड़ाघुमर तक (7 किमी) म 150 फिट डाउनवर्डस ट्रैक, क्रोकोडाइल साइटिंग, सेंडबिच, बर्ड वाचिंग, प्राकृतिक स्वीमिंग एरिया, तीरथा ले बीजाकसा (2.5 किमी) तक के ट्रैकिंग बोटिंग कैम्प, बोनफायर, ट्रायबल फूड, तीरथा गांव के भ्रमण संग स्थनीय स्तर के पौराणिक कहानी के जानकारी दे जाही। बीजाकसा ले मेंदरी तक (8 किमी) म वाटरफॉल , वैली व्यू, जंगली जानवर अऊ पंक्षियों के साइटिंग के आनंद ले जा सकही। एखर अलावा मिचनार हिल्स क्षेत्र म ट्रैकिंग घलोक करवाए जाही।
बस्तर जिला म स्थित कांगेर वैली नेशनल पार्क (Kanger Valley National Park) के अधीन अवइया टोपर वाटरफॉल के ट्रैकिंग, मड़वा वाटरफॉल के ट्रैकिंग, शिवगंगा ट्रैकिंग म जंगल एरिया के बीच जलप्रपात, झरना जंगली जानवर बर्ड वाचिंग करवाए जाही। कैलाश गुफा, कैलाश झील, गुड़िया पदर म गांव ले जलप्रपात तक (4 किमी) तक ट्रैकिंग करवाए जाही। तीरथगढ़ वॉटरफॉल ले रानीदरहा वाटरफॉल (3 किमी) तक म जंगल एरिया वाईल्ड लाइफ, बर्ड वाचिंग, मालकेव ट्रैक म मादरकोंटा ले तीरथगढ़ (8 किमी) तक जंगल मन के बीच ट्रैकिंग करवाए जाही। एखर अलावा जिला के माचकोट इलाका म स्थित झील अऊ झरना मन के नाम ले प्रसिद्ध तिरिया म अऊ माचकोट के जंगल मन म भ्रमण करवाए के कार्य योजना बनाए गए हे।
बरसात म बस्तर के प्राकृतिक सौंदर्य के अनुपम नजारा
