कामकाजी महिला मन मन बर बनिस वरदान
कलेक्टर श्री मलिक के विशेष पहल म जिला मुख्यालय म संचालित
महासमुंद, 02 मार्च 2024। कामकाजी महिला मन के आगू हमेशा ए बात के चुनौती रहिथे के जब ओ मन ऑफिस जाहीं त लइका मन के देखभाल कोन करही। ओ मन अक्सर तनाव म रहिथें, फेर आफिस के काम अऊ लइका मन के देखभाल दुनों ल पूरा जिम्मेदारी के संग निभाना चाहथें। कलेक्टर श्री प्रभात मलिक ह ए समस्या के समाधान बर विशेष रुचि दिखाईन अऊ जिला मुख्यालय म जिला के पहला सर्वसुविधायुक्त पालना घर स्थापित करिन। जेखर संचालन महिला अउ बाल विकास विभाग कोति ले करे जात हे। एला छत्तीसगढ़ी म मोर दाई के कोरा के नाम दे गए हे। नाम के जइसे अब लइका इहां घर जइसे माहौल अऊ ममता पाके अड़बड़ खुश अऊ आनंदित हें। लइका मन के खुशी देखके पालक घलोक खुश अऊ संतुष्ट हे। फिलहाल पालना घर म लइका मन के आना जारी हे, धीरे धीरे लइका मन के संख्या बाढ़त हे। जिला कार्यालय म पदस्थ डिप्टी कलेक्टर श्रीमती मिषा कोसले के 2 साल के बेटा पालना घर म दिन भर रहिथे। अइसनहे फुड इंस्पेक्टर अंजना के बेटा अऊ आन अधिकारी मन के लइका घलोक इहां रहिथें। डिप्टी कलेक्टर श्रीमती मिषा कोसले ह बताइस कि बड़े शहर म घलोक अइसन सुविधा नइ हे। लइका इहां खुश हे इही पेरेंट्स के सबले बड़े उपलब्धि हे। इहां जम्मो सुविधा हे अऊ सीसीटीवी कैमरा ले निगरानी घलोक होवत हे। अइसनहे फूड इंस्पेक्टर अंजना ह बताइस कि सबले अच्छा बात इहां के सुविधा अऊ सुरक्षा हे हम पूरा चिंता मुक्त होके अपन काम करत हन। पालना घर के संचालन कार्यालयीन समय भिनसरहा 10:00 बजे ले संझा 5:30 बजे तक करे जात हे।
जानबा हे के कलेक्टर श्री मलिक के पहल म जिला के पहला सर्व सुविधायुक्त पालना घर तैयार करे गए हे। कई रंग ले पुताई अऊ चित्रांकन ले पालना घर आकर्षक लगत हे। इहां सबो कमरा अऊ हॉल वातानुकूलित हे। कुल तीन एसी लगे हे। संगेच 6 सीसीटीवी कैमरा ले कमरा के संग कैंपस के निगरानी करे जात हे। इहां दू कक्ष बनाय गए हे जेमां एक दुलार कक्ष हे जिहां सुरक्षित स्तनपान कराए जा सकत हे। उहें एक स्वप्न लोक जिहां पांच बिस्तर वाला कमरा हे जहां लइका आराम कर सकत हे। पालना घर के मार्गदर्शिका प्रीति साहू ह बताइस कि लइका बहुतेच खुशी अऊ आनंद के संग रहत हें। पालना घर म लइका मन के खेले बर जरूरी खिलौना, झूला, शैक्षणिक सामान अऊ आन सीखे के सामान मौजूद हे। हाल के चारो कोति हिंदी अऊ अंगरेजी म सुंदर अक्षर म वर्णमाला अऊ गिनती लिखे हे। जेखर से लइका सीख सकत हें। लइका मन के जरूरत के मुताबिक फ्रिज संग सुविधायुक्त किचन बनाए गए हे, वॉशरूम म घलोक सबो सुविधा मौजूद हे। एखर अलावा बर्तन अउ आन जरूरी चीज रखे गए हे।
महासमुंद: जिला म सर्व सुविधायुक्त पालना घर ‘मोर दाई के कोरा’ ह लीस आकार
