47 आजीविका डबरी किसान मन बर बनही सहारा, जल संरक्षण के संग बाढ़ही आमदनी
विकसित भारत जी राम जी योजना के तहत सिंचाई, मत्स्य पालन अऊ कृषि गतिविधि मन ल मिलही नवा आधार
जांजगीर-चांपा, मुख्यमंत्री श्री विष्णु देव साय के अगुवाई म राज्य सरकार कोती ले संचालित ‘मोर गांव-मोर पानी अभियान’ ग्रामीण क्षेत्र मन म जल संरक्षण, सिंचाई विस्तार अउ किसान मन के आय बढ़ाय के रद्दा म जबर पहल साबित होवत हे। विकसित भारत जी राम जी योजना के अंतर्गत जांजगीर-चांपा जिला म आजीविका आधारित जल संरचना मन के निर्माण करके किसान मन ल किसानी अउ मछरी पालन के माध्यम ले आत्मनिर्भर बनाए के दिशा म बड़का काम करे जात हे।
47 आजीविका डबरी मन के निर्माण स्वीकृत
जांजगीर-चांपा जिला म अभियान के तहत कुल 47 आजीविका डबरी मन के निर्माण स्वीकृत करे गए हे, जेमें ले 35 डबरी मन के निर्माण पूरा हो चुके हे। बरसात ले भर गए ए डबरी मन के माध्यम ले किसान मन ल सिंचाई बर भरपूर पानी उपलब्ध होवत हे, जेखर से खेती के रकबा बाढ़े के संग कृषि उत्पादन म घलोक बढ़ोतरी होवत हे।
14 डबरी मन म मत्स्य पालन अऊ कृषि आधारित गतिविधि संचालित
आजीविका डबरी मन अब केवल जल संरक्षण के माध्यम भर नइ रहिन, बल्कि ग्रामीण परिवार मन बर अकतहा आवक के मजबूत जरिया घलोक बनत हे। अभी हाल म 14 डबरी मन म मछरी पालन अउ खेती-किसानी आधारित काम संचालित करे जात हे। डबरी मन के मेढ़ म दलहन, तिलहन अउ आन फसल मन के खेती ले किसान मन ल अकतहा उत्पादन अउ बेहतर आमदनी मिलत हे। जिला म 4 डबरी मन के निर्माण काम जारी हे। अभियान ले वर्षा जल संरक्षण, भू-जल स्तर म सुधार अउ सिंचाई सुविधा मन के विस्तार ल नवा गति मिले हे। एखर से किसान अब साल भर किसानी अउ मछरी पालन जइसे आजीविका काम ले जुड़के अपन आय म सरलग बढ़ोतरी करत हें।
मोर गांव-मोर पानी अभियान प्राकृतिक संसाधन मन के जतन
मोर गांव-मोर पानी अभियान प्राकृतिक संसाधन मन के जतन, कृषि उत्पादकता बढ़ाय अऊ ग्रामीण अर्थव्यवस्था ल सुदृढ़ बनाए के दिशा म राज्य सरकार के महत्वपूर्ण पहल के रूप म उभरत हे। ए अभियान जल संरक्षण ल जनभागीदारी ले जोड़त किसान मन ल आत्मनिर्भर बनाए अउ ग्रामीण विकास ल नवा गति देहे काम करत हे।