मोर गांव मोर पानी महाअभियान ‘जल संरक्षण ल नवा दिशा’

इंजेक्शन वेल तकनीक ले भूजल स्तर बढ़ाए के उदीम
बिलासपुर, मुख्यमंत्री श्री विष्णुदेव साय के हुकुम के मुताबिक राज्य के सबो जिला मन म जल संरक्षण अउ संचयन के विशेष प्रयास करे जात हे इही कड़ी म बिलासपुर जिला म जल संरक्षण अउ जल संचय के बड़का उदीम करे जात हे। जिला प्रशासन कोति ले मोर गांव मोर पानी महाअभियान के तहत ए दिशा म कार्ययोजना बनाके व्यापक काम करे जात हे। सुशाासन तिहार म मुख्यमंत्री श्री विष्णुदेव साय के आगमन कोटा ब्लॉक के ग्राम आमागोहन म होए रहिस। आमागोहन गांव ले ही भूजल स्तर बढ़ाए के उदीम कलेक्टर श्री संजय अग्रवाल के बताए रद्दा म जिला म शुरू करे गीस।
मोर गांव मोर पानी महाअभियान के तहत जिला म भूजल रिचार्ज के आधुनिक तकनीक इंजेक्शन वेल ल तेजी ले अपनाए जात हे। ये तकनीक गांव ल जल संकट ले निजात देवाए अऊ भविष्य बर जल सुरक्षा सुनिश्चित करे के दिशा म एक महत्वपूर्ण कदम हे।
का हे इंजेक्शन वेल तकनीक –
इंजेक्शन वेल एक अइसन प्रणाली हे, जेमां वर्षा जल ल सीधा जमीन के भीतर स्थित जल स्तर तक पहुंचाए जाथे। ये प्रक्रिया पानी के भंडारण ले जादा प्रभावी होथे। काबर के ये भूजल ल सीधा रिचार्ज करथे। जेखर से हैंडपंप, कुंवा अऊ तालाब फेर जलयुक्त हो जाथे। ग्राम अमागोहन, सोनपुरी म इंजेक्शन वेल तकनीक के उपयोग करके अभी हाल म सूखा तालाब, पार्कालेशन टैंक, डबरी म इंजेक्शन वेल के काम करे जात हे। ए काम ले सतही जल अउ वर्षा जल ल तालाब म जमा करके ओला फिल्टर करत साफ पानी ले भूजल स्तर ल रिचार्ज करे जात हे।