‘मोर जमीन, मोर मकान’ योजना ले मजदूर भरत लाल अऊ ललिता के घर के सपना होइस साकार

रायपुर 7 जनवरी 2021। दैनिक मजदूरी करइया रायपुर जिला के उरकुरा के भरत लाल साहू अऊ सरोरा के ललिता साहू ह सपना म घलोक नइ सोचे रहिन के उंखर खुद के घर होही। ‘मोर जमीन,मोर मकान’ योजना ह उंकर सपना ल साकार करिस।
भरत लाल साहू ह बताइस के वोखर परिवार म बुजुर्ग माता-पिता घलोक रहिथे। अइसनहे ललिता साहू ह बताइस के वोखर परिवार म 5 सदस्य हे। वोखर लइका पढ़ई करत हे। काली अपर कलेक्टर श्री एन आर साहू, संयुक्त कलेक्टर श्री संदीप अग्रवाल ह शासकीय योजना मन के संबंध म हितग्राही मन ले जानकारी लीन। अइसनहे ग्राम बकतरा के प्रेमिन ह नरेगा के माध्यम ले कराए गए जमीन सुधार अऊ कुमार ह पक्का प्लेटफॉर्म निर्माण बर शासन के सराहना करिन। ग्राम बेनीडीह के लाटा बाई, सुकारो बाई अऊ प्रकाश चंद निषाद ह प्रधानमंत्री घर योजना ले लाभान्वित होए म शासन के धन्यवाद करिस। उमन शासन कोति ले उठाये गए कदम के सराहना करत एखर से अपन संतुष्टि व्यक्त करिन अऊ कहिन के ओ मन ल सहायता प्राप्त करे म कोनो प्रकार के कोई परेशानी नइ होए हे।