बिलासपुर। कोरोना के बढ़त मामला ल देखत हुए एहतियातन प्रशासन अउ ट्रस्ट ह 16 ले 28 अक्टूबर तक मंदिर प्रवेश म रोक लगा दीस हे। ये दौरान ऑनलाइन माध्यम ले घर बईठे ही श्रद्धालु मन बर वर्चुअल माता के दर्शन के सुविधा उपलब्ध रही।
रतनपुर स्थित मां महामाया के दरबार म नवरात्र म लाखों भक्त पहुँचथे। पूरा नौ दिन अनुष्ठान, हवन, पूजन भंडारा, मेला के आयोजन होथे। लेकिन ये बार कोरोना के सेती स्थिति बदले हुए हे तेजी ले संक्रमण फैलत हे। येला देखत हुए प्रशासन अउ मंदिर ट्रस्ट ह निर्णय ले हे कि पर्व के दौरान मंदिर म भक्त मन के प्रवेश प्रतिबंधित रखे के संग ही आने आयोजन घलो नई करे जाही।
ये दौरान मां के पूजा विधि विधान के संग पुजारी मन के उपस्थिति म होही। भक्त घर बईठे ही ऑनलाइन वर्चुअल माता के दर्शन कर सकही। मनोकामना दीप दर्शन बर घलो वीडियो कॉल के सुविधा उपलब्ध होही। 21 हज़ार मनोकामना दीप ये बार प्रज्ज्वलित करे जावत हे। ये दूसरा बार हे जब मंदिर के पट भक्त मन बर बन्द होवत हे, एखर पहली चैत्र नवरात्र म घलो कोरोना के सेती मंदिर म भक्त मन के प्रवेश के अनुमति नई रिहिस।
