अविभाजित मध्यप्रदेश के पहिली मुख्यमंत्री श्री मोतीलाल वोरा के निधन म मुख्यमंत्री श्री भूपेश बघेल ह गहरा दुख व्यक्त करिन

रायपुर, 21 दिसंबर 2020। अविभाजित मध्यप्रदेश म दू पईत मुख्यमंत्री अऊ उत्तरप्रदेश म राज्यपाल रहे वरिष्ठ कांग्रेस नेता श्री मोतीलाल वोरा के निधन म छत्तीसगढ़ के मुख्यमंत्री श्री भूपेश बघेल ह गहरा शोक व्यक्त करत ओ मन ल श्रद्धांजलि अर्पित करे हें। श्री बघेल ह कहिन के बाबूजी श्री मोतीलाल वोरा जी के जाना न केवल छत्तीसगढ़ भलुक पूरा कांग्रेस परिवार बर एक अभिभावक के चले जाय जइसे हे। जमीनी स्तर ले राजनीति शुरु करके राष्ट्रीय स्तर म उमन अपन एक अलग पहिचान बनाइन अऊ आजीवन एक समर्पित कांग्रेसी बने रहिन। उंखर जगा कभू नइ भरे जा सकय। मुख्यमंत्री श्री बघेल ह कहिन – मैं ह अपन राजनीति के ककहरा जऊन मनखे मन ले सीखेंव, ओमां बाबूजी एक रहिस। अविभाजित मध्यप्रदेश ले लेके छत्तीसगढ़ तक ओ मन हम कांग्रेस कार्यकर्ता मन बर एक पथ प्रदर्शक रहिन। ईश्वर ओ मन ल अपन श्रीचरण म स्थान देवयं अऊ परिवार ल ये कठिन समय म दुख सहे के शक्ति प्रदान करयं।
श्री बघेल ह कहिन के कालेच बाबूजी श्री वोरा के 93 वां जन्मदिन मनाए गीस, कोनो ह कल्पना नइ करे रहिस के आज अइसन दुखद खबर सुनने ल मिलही। उमन कहिन के अविभाजित मध्यप्रदेश के मुख्यमंत्री के रूप म श्री वोरा ह तत्कालीन छत्तीसगढ़ अंचल के चहुंमुखी विकास बर अपन अमूल्य योगदान दीस। उमन पत्रकारिता ले अपन सार्वजनिक जीवन के शुरुआत करे रहिन। साल 1968 म ओ मन दुर्ग नगर निगम म पार्षद निर्वाचित होए रहिन। साल 1972 म ओ मन पहली पइत कांग्रेस के विधायक बनिन। एखर बाद 1977 अऊ 1980 म घलोक विधायक निर्वाचित होइन। मध्यप्रदेश के तत्कालीन मुख्यमंत्री श्री अर्जुन सिंह ह ओ मन ल कैबिनेट मंत्री बनाइन। ओ मन दू पइत मध्यप्रदेश के मुख्यमंत्री बनिन। उत्तरप्रदेश के राज्यपाल अऊ केंद्रीय मंत्री के रूप म घलोक अपन दायित्व मन के निर्वहन करिन।