मोटराईज्ड ट्रायसायकल मिले ले परमेश्वरी यादव होइस आत्मनिर्भर

महासमुंद 13 जुलाई 2021। राज्य शासन कोति ले समाज के सबो वर्ग के हित बर बहुत अकन जन कल्याणकारी योजना चालित करे जात हे। जेखर लाभ पात्रतानुसार हितग्राही मन ल देहे जात हे। समाज कल्याण विभाग कोति ले पाछू दिनन म कृत्रिम अंग सहायक उपकरण योजनांतर्गत जिला मुख्यालय महासमुन्द के वार्ड नंबर 06 नयापारा निवासी 21 वर्षीय कु. परमेश्वरी यादव ल मोटराईज्ड ट्रायसायकल सौंपे गीस।
कु. परमेश्वरी यादव के बताती ओ ह 80 प्रतिशत् अस्थिबाधित दिव्यांगता ले ग्रसित हे। दिव्यांग होए के सेती ओला अपन रोजमर्रा के काम मन बर घर ले बाहिर आए-जाए म अड़बड़ परेसानी के सामना करना परत रहिस। कोनो ह ओ ल बताइस कि समाज कल्याण विभाग कोति ले दिव्यांगजन मन ल पात्रतानुसार लाभान्वित करे जात हे। फेर वो ह समाज कल्याण विभाग महासमुंद पहुंचके मोटोराईज्ड ट्रायसायकल बर आवेदन दीस। वोखर स्थिति ल ध्यान म रखके विभाग ह वोखर आवेदन म कार्रवाई करत बैटरी चलित मोटराईज्ड ट्रायसायकल दीस।
वो ह बताइस के घर के आर्थिक स्थिति मजबूत नइ होए के सेती वोखर घर वाले मोटराईज्ड ट्रायसायकल नइ बिसा सकत रहिन। विभाग कोति ले मोटराईज्ड ट्रायसायकल मिले ले ओ ह अड़बड़ खुश हे। वो ह राज्य शासन, जिला प्रशासन अऊ समाज कल्याण विभाग कोति ले वोखर आवेदन म लउहे कार्रवाई करे म हिरदे ले आभार व्यक्त करे हे। वो ह कहिस कि मोटराईज्ड ट्रायसायकल मिले ले अपन निजी काम बर अब दूसर मन उपर निर्भर होना नइ परही। अब ओ ह आत्मनिर्भर हो गए हे, अपन निजी काम बर खुद आना-जाना सुगमता ले कर सकही।