मुख्यमंत्री भूपेश बघेल ले पर्वतारोही चित्रसेन साहू ह करिस मुलाकात

रायपुर, मुख्यमंत्री भूपेश बघेल ले काली संझा ऊंखर निवास कार्यालय म बालोद निवासी पर्वतारोही श्री चित्रसेन साहू ह सौजन्य मुलाक़ात करिन। साहू ह मुख्यमंत्री ल पाछू 23 अगस्त के यूरोप महाद्वीप के सबले ऊंचा चोटी माउंट एलब्रुस (5642 मीटर) म अपन कृत्रिम पांव ले कठिन चढ़ाई करके शिखर म लहराए तिरंगा भेंट करिन। मुख्यमंत्री बघेल ह चित्रसेन साहू ल ये उपलब्धि उपर हार्दिक बधाई देवत कहिन कि उमन अपन बाधा मन ल अपन शक्ति बनाके युवा मन बर प्रेरणादायक उदाहरण प्रस्तुत करे हें अऊ अपन अदम्य हौसला बऊ जज्बा ले छत्तीसगढ़ के मान बढ़ाए हें। मुख्यमंत्री बघेल ल पर्वतारोही साहू ह बताइस कि एखर ले पहिली ओ ह अफ्रीका महाद्वीप के माउंट किलिमंजारो अऊ ऑस्ट्रेलिया के माउंट कोजियस्को ल घलोक फतह कर डरे हे। ओ ह तीन महाद्वीप के चोटी ल फतह करइया पहिली भारतीय डबल ऐम्प्युटी (दुनों पांव कृत्रिम) हे। साहू ह भविष्य के योजना मन ल साझा करत मुख्यमंत्री ल बताइस कि ओखर लक्ष्य सातों महाद्वीप के सात ऊँचा चोटी ल फतह करे के हे, एमां ले तीन ओ ह हासिल कर उरे हे अऊ एशिया के सबले उंचा चोटी माउंट एवरेस्ट संग 4 चोटी बांचे हे। एखर बाद ओ ह दिसंबर म दक्षिण अमेरिका के माउंट एकांकागुआ के चढाई करही। मुख्यमंत्री बघेल ह ओ ल वोखर आगामी लक्ष्य के प्राप्ति बर शुभकामना दीन।