मुख्यमंत्री श्री भूपेश बघेल ले छत्तीसगढ के पर्वतारोही सुश्री याशी जैन ह करिस सौजन्य मुलाकात

रायपुर, मुख्यमंत्री श्री भूपेश बघेल ले आज संझा इहां ऊंखर निवास कार्यालय म छत्तीसगढ़ के रायगढ़ जिला के प्रसिद्ध पर्वतारोही सुश्री याशी जैन ह सौजन्य मुलाकात करिस। सुश्री याशी ह मख्यमंत्री ल बताइस के ओ ह माउंट एवरेस्ट के चढ़ाई बर गे 15 झन के टीम म छत्तीसगढ़ के एकमात्र सदस्य हे। माउंट एवरेस्ट फतह करे के उंखर टीम के ये अभियान 1 अपरेल ले शुरू होवइया हे, जेन 45 दिन तक चलही। मुख्यमंत्री श्री बघेल ह सुश्री याशी जैन के उत्साहवर्धन करत ओ ल सफलता बर शुभकामना दीन अऊ प्रोत्साहन राशि के तौर म 5 लाख रुपए देहे के घोषणा करिन। मुख्यमंत्री ह सुश्री याशी कोति ले माउंट एवरेस्ट फतह के बाद उहां फहराए जाय वाले ‘भारतीय राष्ट्रीय ध्वज’ अऊ ‘गढ़बो नवा छत्तीसगढ़’ ध्वज के विमोचन घलोक करिन।
पर्वतारोही सुश्री याशी जैन ह तीन महाद्वीपं के सबले ऊंचा चोटी ल फतह करके तिरंगा संग बेटी बचाओ अभियान के परचम फहराए हे। याशी जैन ह 14 फरवरी 2023 के दक्षिण अमेरिका के सबले ऊंचा चोटी, माउंट अकंकागुआ (6961 मीटर) फतह करिस। 2 अकटूबर 2022 के 5896 मीटर ऊंचा माउंट किलिमंजारो म सफलतापूर्वक चढ़ाई करिसे जे ह अफ्रीका के सबले ऊंचा चोटी ये। ओ ह साल 2021 म माउंट एवरेस्ट म चढ़ाई करे के अभियान म कैंप-4, 8000 मीटर के ऊंचाई तक पहुँचे रहिस। सुश्री याशी ह जनवरी 2021 म 6119 मीटर ऊंचा लोबुचे ईस्ट पीक म सफलतापूर्वक चढ़ाई करे रहिसे। जनवरी 2020 म वो ह 6189 मीटर ऊंची आईलैंड पीक नेपाल म सफलतापूर्वक चढ़ाई करिस। साल 2019 म याशी ह यूरोप के सबले ऊंचा चोटी 5642 मीटर ऊंचा माउंट एल्ब्रस म अउर साल 2018 म हिमालयी क्षेत्र म 6116 मीटर ऊंची माऊंट जोगिन 3 चोटी फतह करे म म सफलता पाए हे। मुख्यमंत्री ले मुलाकात के समय याशी के पिता श्री अखिलेश जैन, माता श्रीमती अलका जैन अऊ श्री प्रवीण जैन मौजूद रहिन।