रायपुर, मुख्यमंत्री श्री भूपेश बघेल आज रायपुर के पंडरी स्थित गुरूद्वारा म सिक्ख धर्म के 10 वां गुरु, गुरु गोविंद सिंह जी के जयंती म आयोजित 353 वां प्रकाश पर्व समारोह म सामिल होइन। मुख्यमंत्री ह गुरूग्रंथ साहब के आगू मत्था टेक के प्रदेश के सुख समृद्धि अऊ खुशहाली के कामना करिन।
मुख्यमंत्री श्री बघेल ह ये बेरा म कहिन कि गुरु नानक देव जी ह सिक्ख धर्म के स्थापना करिन, गुरु गोविन्द सिंह जी ह खालसा पंथ के स्थापना करिन। उमन समाज ल जोड़े के अदभुत काम करिन। गुरु गोविंद सिंह जी समाज सुधारक तो रहिन ही, ओ मन बड़े योद्धा घलोक रहिन। वीर योद्धा तियार करे के संगेच ओ मन बड़े साधक घलोक रहिन। गुरु गोविंद सिंह जी अइसन गुरु रहिन जेमन कहिन कि गुरु ग्रन्थ साहेब ही सिक्ख धर्म के गुरु होही। अब गुरु ग्रन्थ साहब ही हमर मार्गदर्शन करत हे।
श्री बघेल ह कहिन कि आज हमला गुरू गोविंद जी के बताए रद्दा म चले के संकल्प लेना चाही। इही हमर ऊंखर प्रति विनम्र श्रद्धांजलि होही। मुख्यमंत्री ह कहिन कि ये धरती हम सब के हे। हम सबला मिलके एखर रक्षा अऊ देखभाल करना चाही। मुख्यमंत्री ह कहिन कि सिक्ख समाज एक जिंदा दिल कौम हे, जऊन हर स्थिति म खुश रहिथे अऊ खूब मेहनत करथे। मुख्यमंत्री ह गुरू गोविंद सिंह जी के प्रकाश पर्व म सिक्ख समाज संग प्रदेशवासी मन ल बधाई अऊ शुभकामना दीन। विधायक श्री सत्यनारायण शर्मा ह घलोक सिक्ख समाज ल बधाई देवत ये जानकारी दीन कि हाले म ओ मन करतारपुर के यात्रा करके वापस लहुटे हें।
विधायक द्वय श्री कुलदीप जुनेजा अऊ श्री सत्यनारायण शर्मा, नगर निगम रायपुर के महापौर श्री प्रमोद दुबे, छत्तीसगढ़ अल्पसंख्यक आयोग के अध्यक्ष श्री महेंद्र सिंह छाबड़ा विशेष अतिथि के रूप म उपस्थित रहिन। ये बेरा म सिक्ख समाज कोति ले मुख्यमंत्री ल सरोपा भेंट करके उंखर अभिनंदन करिन। गुरूद्वारा प्रबंधक कमेटी के अध्यक्ष श्री प्रीतपाल सिंह चंडोक संग बहुत अकन पदाधिकारी अऊ सदस्य अऊ श्रद्धालु बड़ संख्या म उपस्थित रहिन।
