- श्री गहलोत ह श्री बघेल ल करिस आश्वस्त: कहिन लइका मन बर कोटा म ही सबो व्यवस्था करे जात हे, चिंता के कोनो बात नइ हे
- श्री बघेल ह अभिभावक मन ले कहिन कहूं कोनो लइका ल कोई परेशानी होही त अपन जिला कलेक्टर ल अवगत करवावंय
रायपुर, 18 अप्रैल 2020। मुख्यमंत्री श्री भूपेश बघेल ह कोटा राजस्थान म पढ़त छत्तीसगढ़ के लइका मन के व्यवस्था ल लेके आज राजस्थान के मुख्यमंत्री श्री अशोक गहलोत ले बात करिन। राजस्थान के मुख्यमंत्री श्री गहलोत ह श्री बघेल ल आश्वस्त करिन के कोटा म रहत लइका मन ल लेके कोनो प्रकार के चिंता करे के जरूरत नइ हे। सबो लइका मन बर राजस्थान सरकार ह सबो जरूरी व्यवस्था कोटा म ही ठउका करे हे। एखर बर राजस्थान सरकार कोति ले नोडल अधिकारी घलोक नियुक्त करे गए हे संगेच हेल्पलाईन नंबर (Dist. Covid. Control room no. 07442325342 कोटा राजस्थान) घलोक जारी करे गए हे।
मुख्यमंत्री श्री भूपेश बघेल ह कोटा म पढ़त छत्तीसगढ़ के लइका मन के अभिभावक मन ले कहे हें के ओ मन ल कोनो प्रकार के परेशान होए के जरूरत नइ हे, छत्तीसगढ़ सरकार लइका मन के सुरक्षा अऊ उंखर व्यवस्था बर कृतसंकल्पित हे। उमन कहिन के कहूं कोटा म कोनो लइका ल कोनो परेशानी होही त ऊंखर अभिभावक पूरा जानकारी के संग अपन जिला कलेक्टर ल अवगत करावंय ताकि कोटा म उंखर समस्या के निराकरण करे जा सकय। मुख्यमंत्री ह कहिन हे के कोटा म लइका मन के व्यवस्था ल लेके सचिव परिवहन डॉक्टर कमलप्रीत सिंह अउ अपर मुख्य सचिव श्री सुब्रत साहू राजस्थान सरकार के उच्च अधिकारी मन ले सरलग संपर्क म हें अऊ लइका मन के व्यवस्था के सरलग जानकारी लेवत हें।