रायपुर, 12 अगस्त 2024। उपमुख्यमंत्री श्री विजय शर्मा ह आज भिनसरहा अमरकंटक स्थित नर्मदा मैय्या मंदिर अऊ जलेश्वर महादेव मंदिर पहुँचके पूजा-अर्चना करके आशीर्वाद लीन। उपमुख्यमंत्री श्री शर्मा ह माँ नर्मदा अऊ भगवान शिव ले प्रदेशवासी मन के सुख-शांति-समृद्धि के कामना करिन।
जानबा हे कि उपमुख्यमंत्री श्री विजय शर्मा ह काली अमरकंटक के मृत्युंजय आश्रम म कांवड़िया मन बर करे गए व्यवस्था मन के निरीक्षण करे रहिन अऊ खुद कांवड़िया मन के संग बइठके जेवन घलोक करे रहिन। उमन कांवड़िया मन ल जेवन परूसे तको रहिन। उमन अमरकंटक ले भोरमदेव मंदिर तक के 150 किलोमीटर लंबा कांवड़ यात्रा ल सुगम अऊ सुरक्षित बनाए बर विशेष इंतजाम करे हें, ताकि भक्तगण मन ल यात्रा के समय कोनो प्रकार के दिक्कत झन होवय। ऊंखर हुकुम के मुताबिक कांवड़िया मन बर 15 ले जादा जगा मन म चिकित्सक अऊ स्वास्थ्य कर्मचारी मन के ड्यूटी लगाए गए हे। यात्रा के समय सुरक्षा के दृष्टि ले घलोक विशेष प्रबंध करे गए हे, जेमें 4 पुलिस पेट्रोलिंग टीम अऊ अनुविभागीय अधिकारी पुलिस के ड्यूटी सामिल हे। पुलिस अधीक्षक मन ल ए संबंध म विस्तृत निर्देश देहे गे हे, ताकि कांवड़िया मन के सुरक्षा सुनिश्चित करे जा सकय।
कांवड़िया मन बर 20 ले जादा जगा म बिलमे के विशेष व्यवस्था करे गए हे। अमरकंटक के मृत्युंजय आश्रम म निःशुल्क भोजन अऊ रात्रि थिरावन के व्यवस्था करे गए हे, जेमां दाल-भात, सब्जी, मिठाई जइसे खीर, पुड़ी अऊ हलवा के समावेश हे। ए व्यवस्था मन के निगरानी म बोलबम समन्वय समिति अऊ स्थानीय अधिकारी सक्रिय रूप ले जुटे हें।
उपमुख्यमंत्री श्री विजय शर्मा ह कहिन के हमार बर कांवड़िया मन के सुविधा अऊ सुरक्षा सर्वापरि हे। सावन महिना के ए पवित्र अवसर म हमन सबो जरूरी प्रबंध सुनिश्चित करे हन ताकि सबो भक्तजन बिना कोनो कठिनाई के अपन यात्रा पूरा कर सकंय।
