मुद्रा लोन ले लखपति दीदी बने के सपना होइस साकार

जशपुर, मुख्यमंत्री श्री विष्णु देव साय के मंशा के मुताबिक राज्य म महिला मन ला मजबूत बनाये बर सासन-प्रसासन डहार ले बड़े कोसिस करत हे। महिला मन ला स्व-सहायता समूह के माध्यम ले आत्मनिर्भर बनाये बर सासन के अलग-अलग योजना मन के लाभ देहे जात हे। महिला सशक्तिकरण बर चलत सरकारी योजना मन के बढ़िया असर जशपुर जिला म साफ दिखत हवय। विकासखंड बगीचा के ग्राम बुढाडांड के रहइया प्रीति गुप्ता ह मुद्रा लोन के मदद ले आत्मनिर्भरता के एक मिसाल पेस करे हवय।
लक्ष्मी स्व-सहायता समूह ले जुड़े प्रीति ला एक लाख रुपिया के मुद्रा लोन मिलिस, जेकर ले ओ ह ‘दुर्गा श्रृंगार अउ किराना दुकान’ सुरु करिस। सुरु म छोटे स्तर म चलत ए व्यापार ह आज गांव के बड़े दुकान मन म सामिल हो गे हवय। मनिहारी सामान अउ रोज के जरूरत के चीज मन के मिले के सेती ओकर दुकान ह मनखे मन बर खास केंद्र बन गे हवय। सरलग मेहनत, लगन अउ राष्ट्रीय ग्रामीण आजीविका मिशन (बिहान) के सहयोग ले प्रीति ह आज हर बछर लगभग 2.50 लाख रुपिया के सुध मुनाफा कमावत हवय अउ ‘लखपति दीदी’ के रूप म अपन पहिचान बना डारे हवय। प्रीति ह मुख्यमंत्री विष्णु देव साय के आभार जतावत कहिस के राज्य सरकार के योजना मन ह ओला आत्मनिर्भर बने के मौका दीस।