मुख्यमंत्री श्री विष्णु देव साय ह प्रदेश के विद्युत उपभोक्ता मन खातिर करिन बड़का घोषणा

200 यूनिट तक मिलही हाफ बिजली के लाभ
प्रदेश के 42 लाख उपभोक्ता होही लाभान्वित
प्रधानमंत्री सुरुज घर मुफ्त बिजली योजना के लाभ प्रदेश के सबो उपभोक्ता मनल
रायपुर, राज्य के विद्युत उपभोक्ता मन ल बड़का राहत देवत मुख्यमंत्री श्री विष्णु देव साय ह आज विधानसभा के विशेष सत्र म नवा बिजली योजना के घोषणा करिन। अब प्रदेश के अइसन घरेलू उपभोक्ता मन ल जिनकर 200 यूनिट तक विद्युत खपत हे ओ मन ल 200 यूनिट तक हाफ बिजली के पूरा लाभ मिलही। ए निर्णय ले राज्य के 36 लाख घरेलू उपभोक्ता सीधा तौर म लाभान्वित होहीं। 200 ले 400 यूनिट तक बिजली खपत करइया उपभोक्ता मन ल घलोक अवइया 1 साल तक 200 यूनिट तक हॉफ बिजली बिल के लाभ मिलही, एखर से 6 लाख उपभोक्ता लाभान्वित होहीं। ए उपभोक्ता मन ल 1 साल तक के छूट देहे गए हे ताकि ए अवधि म ओ मन अपन घर मन म पीएम सूर्यघर मुफ्त बिजली योजना के तहत सोलर प्लांट स्थापित करा सकंय। ए प्रकार ले 200 यूनिट तक हॉफ बिजली बिल योजना ले प्रदेश के 45 लाख उपभोक्ता मन म ले 42 लाख उपभोक्ता लाभान्वित होहीं, उहें प्रधानमंत्री सुरुज घर बिजली योजना के लाभ प्रदेश के सबो उपभोक्ता मन ल मिलही।
मुख्यमंत्री श्री साय ह कहिन के राज्य सरकार के सबले बड़का प्राथमिकता हर उपभोक्ता ल सस्ता, सुचारू अऊ भरोसेमंद विद्युत आपूर्ति उपलब्ध कराना हे। सोलर प्लांट स्थापना प्रक्रिया म समय लगे के सेती घरेलू उपभोक्ता मन खातिर 1 दिसंबर ले नवा योजना लागू करे जात हे, जेखर से आम जनता के बिजली बिल म महत्वपूर्ण कमी आही।
मुख्यमंत्री श्री साय ह ये घलोक बताइन के पीएम सूर्यघर मुफ्त बिजली योजना के अंतर्गत राज्य शासन कोति ले ले सब्सिडी देहे जात हे। जेखर तहत 1 किलोवॉट क्षमता के सोलर प्लांट म 15,000 रूपिया अऊ 2 किलोवॉट या ओखर से जादा क्षमता के प्लांट म 30,000 रूपिया के अकतहा सब्सिडी देहे जात हे। ये व्यवस्था राज्य म सौर ऊर्जा अपनइया मन ल प्रोत्साहित करही अऊ अवइया समय म उपभोक्ता मन ल हाफ बिजली ले फ्री बिजली कोति ले जाही।
मुख्यमंत्री ह विश्वास व्यक्त करिन के ये निर्णय नइ केवल जनता के बिजली बिल ल कम करही बल्कि राज्य ल ऊर्जा क्षेत्र म आत्मनिर्भर बनाए के दिशा म एक मजबूत कदम साबित होही।