बढ़िया विभागीय ताल-मेल ले काम-बूता म लावव तेजी: सचिव श्री बंसल

मुंगेली, लोक निर्माण विभाग के सचिव श्री मुकेश कुमार बंसल ह काली मुंगेली जिला के दउरा करके बनत काम मन के निरीक्षण अउ समीक्षा करिन। उमन ह विभागीय अधिकारी मन ले कहिन के बनावट के काम मन म कोनो घलोक स्तर ऊपर ढील-ढाल बरदास्त नइ करे जाही। ओमन ह जम्मो अधिकारी मन ला पूरा जिम्मेदारी के संग फील्ड म उतरके बनावट के काम मन ला तेज करे के निर्देश दीन। श्री बंसल ह बनत लोरमी बायपास सड़क के निरीक्षण करके विभागीय अधिकारी मन अउ ठेकेदार मन ला एला समय-सीमा के भितरी पूरा करे के निर्देश दीन।
विभागीय सचिव ह मुंगेली सर्किट हाउस म रखे गे बैठक म कहिन के बनावट के काम मन म गुणवत्ता अउ तेजी दुनों पक्का करना विभाग के सबले पहिली प्राथमिकता आय। एमा कोनो लापरवाही झन होवय। ओमन ह नगरीय निकाय अउ दूसर विभाग मन के संग ताल-मेल बनाके सड़क बनावट के काम मन ला तेज करे के निर्देश दीन। ओमन ह खराब सड़क मन म पैच-वर्क करवाए बर घलो कहिन।
श्री बंसल ह सुघर यातायात ला सासन के पहिली प्राथमिकता बतावत गॉंव मन ला बारहमासी सड़क मन ले जोड़े बर प्रस्ताव तइयार करके तुरंत सासन ला भेजे के निर्देश दीन। ओमन ह फील्ड के नियम से दउरा करके चलत काम मन के बारीकी ले निरीक्षण करे अउ गुन के संग समय-सीमा म काम पूरा करवाना पक्का करे के निर्देश दीन।
मुंगेली के कलेक्टर श्री कुन्दन कुमार, डीएफओ श्री अभिनव कुमार, जिला पंचायत के सीईओ श्री प्रभाकर पाण्डेय, लोक निर्माण विभाग के प्रमुख अभियंता श्री वी.के. भतपहरी, बिलासपुर परिक्षेत्र के मुख्य अभियंता श्री आर.के. रात्रे, राष्ट्रीय राज्यमार्ग परिक्षेत्र के मुख्य अभियंता श्री ज्ञानेश्वर कश्यप, अधीक्षण अभियंता श्री के.पी. संत, कार्यपालन अभियंता सर्वश्री शरद सतपथी, आर.के. खामरा अउ श्री नीतिश तिवारी घलो बैठक म संघरे रहिन।