मुख्यमंत्री दाउ भूपेश बघेल के अपील : प्रदेश म कोरोना के रोकथाम बर जम्मो पात्र नागरिक टीकाकरण बजुर करवावयं

रइपुर, 01 अप्रैल 2021 बिरस्पत। मुख्यमंत्री दाउ भूपेश बघेल ह प्रदेश म कोरोना वायरस (कोविड-19) के बाढ़त बगराव ल देखत जम्मो पात्र लोगन मन ले कोरोना के टीका लगवाए के अपील करे हवय । उन्मन कहीन हे कि टीका के संगे-संग सावधानी रखत शासन कोति ले जारी दिशा-निर्देश मन के पालन करना चाही। येह प्रदेश म कोरोना के रोकथाम करे के दिशा म अबड़े मददगार साबित होही। दाउ बघेल ह कहीन कि प्रदेश म भरपूर संख्या म टीका उपलब्ध हे। जम्मो जिला म लोगन मन के टीकाकरण बर सुविधा उपलब्ध करवाए गे हे। मुख्यमंत्री दाउ बघेल ह जम्मो सामाजिक प्रमुख, समाज सेवी संस्था, धार्मिक संस्था, व्यापारिक संस्था अउ समाज के प्रबुद्ध लोगन मन ल आमजन ल अधिक से अधिक संख्या म टीकाकरण बर प्रेरित करने के अपील करे हावय।
उल्लेखनीय हे कि आज ले 45 बछर ले अधिक उम्रर के सबो नागरिक मन ल तको टीका लगाए जावत हावय । कतकोन लोगन मन ल टीका के दूसरइया डोज तको लगाये जा चुके हावय। संग म एक मार्च ले 60 बछर ले अधिक उमर के नागरिक अउ 45 बछर ले 59 बछर तक के कोमोरबिडीटी वाले मन ल तको टीका लगाए जावत हे।