- धान उपार्जन केन्द्र मन के व्यवस्था, रजिस्टर अऊ टोकन के जांच करिन
- धान तौलई कराके कांटा-बाट के करिन जांच
रायपुर, छत्तीसगढ़ शासन के मुख्य सचिव श्री आर. पी. मण्डल ह आज भिनसरहा राज्य के सीमावर्ती ईलाका मन के धान खरीदी केन्द्र मन के औचक निरीक्षण करिन। हेलीकाप्टर ले निकले श्री मण्डल ह भिनसरहा साढ़े आठ बजे ले निरीक्षण चालू करत राजनांदगांव जिला के चिरचारी, कवर्धा जिला के रेंगाखार, मुंगेली जिला के पंडरभट्टा, बिलासपुर जिला के कोटा-पिपरसरई-भरारी-नेवरा, जांजगीर-चांपा जिला के चारपारा स्थित धान खरीदी केन्द्र मन के निरीक्षण करिन। ये बेरा म उमन खरीदी केन्द्र प्रभारी मन ले धान खरीदी बर करे गए जरूरी व्यवस्था मन के जानकारी लीन अऊ धान बेचे आए किसान मन ले घलोक व्यवस्था के संबंध म जानकारी लीन। उमन राज्य के किसान मन ले अपील करिन कि धान खरीदी अभियान के तहत किसान मन ले धान खरीदी करे जात हे। धान खरीदी के रकम किसान मन के खाता म सीधा जमा कर दिए जात हे। किसान कोनो प्रकार के अफवाह या भ्रामक बात मन म झन आवयं अऊ हरहिंछा धान खरीदी केन्द्र मन म धान बेचे जावयं। धान खरीदी प्रक्रिया के निरीक्षण करे पहुंचे श्री मण्डल ह अपन आगूच धान के नाप-तौल करवाके कांटा, बाट के जांच करिन अऊ धान के गुणवत्ता ल घलोक परखिन। उमन छोटे अऊ मध्यम श्रेणी के किसान मन के धान पहिली खरीदे के निर्देश उपार्जन केन्द्र प्रभारी मन ल दीन।
निरीक्षण के समय श्री मण्डल ह राजस्व विभाग के अनुविभागीय अधिकारी मन, खाद्य अधिकारी मन, तहसीलदार मन अऊ समिति प्रबंधक मन ल स्पष्ट रूप ले कहिन कि समिति मन म धान विक्रय बर अवइया किसान मन ल कोनो प्रकार के परेशानी नइ होना चाही। धान खरीदी केन्द्र मन म अवैध रूप ले धान विक्रय करइया कोचिया अऊ बिचौलिया मन उपर सतत् निगरानी रखे जाय। सीमावर्ती ईलाका मन ले धान के अवैध परिवहन करत पाए जाय म ये काम म लिप्त सबो मनखे मन के खिलाफ एफआईआर दर्ज करे जाय। निरीक्षण के समय खाद्य विभाग के सचिव डा. कमलप्रीत सिंह, राज्य विपणन संघ के प्रबंध संचालक श्रीमती शम्मी आबिदी घलोक संग म रहिन।