मुख्यमंत्री करा सौंरा, गोंड़, बिझिया, उरांव, भुंजिया आदि समाज के प्रतिनिधि मन ह करिस सौजन्य मुलाकात

राज्यसभा म छत्तीसगढ़ के जाति ल अनुसूचित जनजाति म जोडे़ जाए संबंधित विधेयक पारित होए म मुख्यमंत्री के प्रति प्रकट करिस आभार
 रायपुर, 26 जुलाई 2023
मुख्यमंत्री श्री भूपेश बघेल के छत्तीसगढ़ के जाति समुदाय ल अनुसूचित जनजाति म जोडे़ के प्रयास ल बडे़ सफलता मिलिस हे, जब मंगलवार के राज्यसभा ह संविधान (अनुसूचित जनजाति) आदेश (पांचवां संशोधन) विधेयक 2022 ल मंजूरी दे दिस। एकर पहिली पउर साल दिसम्बर म लोकसभा ह ए विधेयक ल पारित करे रहिस हे।
    बड़ लंबा समय ले अनुसूचित जनजाति म जोड़े के मांग ल लेके प्रयास करत सौंरा, गोंड़, बिझिया, उरांव, भुजिया आदि समाज के प्रतिनिधि मन ह कल देर रात मुख्यमंत्री श्री भूपेश बघेल करा सौजन्य मुलाकात कर ए विधेयक ल राज्यसभा ले मंजूरी मिले म उकर प्रति आभार प्रकट करिस। मुख्यमंत्री श्री बघेल ह राज्य सरकार के सरलग प्रयास ले मिले ए सफलता म प्रतिनिधिमंडल ल बधई अउ शुभकामना देत हुए कहिस के राज्य सरकार अनुसूचित जनजाति समुदाय ल उमन के अधिकार के लाभ देवाए ब दृढ़ संकल्पित हे।
     ओ ह कहिस कि छत्तीसगढ़ राज्य अनुसूचित जनजाति आयोग के घलो एमा महत्वपूर्ण भूमिका हे। ए संबंध म प्रधानमंत्री ल घलो पत्र लिख के मात्रात्मक त्रुटि के सेती आदिवासी समुदाय ल होवत परसानी ले अवगत कराय गइस अउ उमन ल अनुसूचित जनजाति म जोड़े के आग्रह करे रहिस।
    मुख्यमंत्री ह कहिस के अनुसूचित जनजाति आयोग ल विभिन्न समाज के माध्यम ले जे ज्ञापन मिलिस, आयोग कती ले उकर सुनवाई कर के ट्राईबल रिसर्च इंस्टिट्यूट के माध्यम ले अध्ययन के बाद प्रस्ताव तियार कर भारत सरकार ल भेजे गईस। राज्य सरकार के ए पहल म जाति समुदाय ल अनुसूचित जनजाति म जोडे़ संबंधी विधेयक ल लोकसभा अउ राज्यसभा ले मंजूरी मिलिस हे।
    मुख्यमंत्री करा मुलाकात के बेरा सर्वश्री रवि सिदार, खोलबहरा सिदार, लकेश्वर श्याम, दीनबन्धु, शत्रुघन अउ रोहित सिदार घलो उपस्थित रहिस हे।
Success story
Neha Rathore