रइपुर 12/04/2021 इतवार । मुख्यमंत्री दाउ भूपेश बघेल ह नगर निगम अउ रायपुर स्मार्ट सिटी लिमिटेड डाहर ले सरदार बलबीर सिंह जुनेजा इंडोर स्टेडियम म बनाए गेहे ऑक्सीजन युक्त 360 बिस्तर के संग सर्व सुविधायुक्त अस्थाई कोविड अस्पताल के वर्चुअल निरीक्षण करीन।ये बेरा म छत्तीसगढ़ गृह निर्माण मंडल के अध्यक्ष श्री कुलदीप जुनेजा अउ महापौर श्री एजाज ढेबर तको उन्कर संग रिहिन हे। ये अस्पताल ल केवल 04 दिन म तियार करके नगर निगम अउ रायपुर स्मार्ट सिटी लिमिटेड ह जरूरी सेवा मन के संग मरीज मन के मनोरंजन अउ घर ले संपर्क तक के जम्मो बेवस्था करे हावय। ये कोविड अस्पताल के संचालन जिला प्रशासन के मार्गदर्शन म स्वास्थ्य विभाग के चिकित्सक अउ उन्कर टीम कोति ले करे जाही, जउन आवश्यकता अनुरूप अस्पताल म मरीज मन के भर्ती सुनिश्चित करही। मरीज मन के बाढ़त संख्या ल देखत रइपुर म कम बेरा म बने चिकित्सा सहायता बर मुख्यमंत्री दाउ बघेल ह ये काम म लगे जम्मो टीम के उदीम ल सहिराइस हे।
मुख्यमंत्री दाउ बघेल अपन घरे ले वर्चुअल निरीक्षण करके इंडोर स्टेडियम म बने ये अस्थाई कोविड अस्पताल के सुविधा मन के विस्तृत जानकारी लीन। सरदार बलबीर सिंह जुनेजा इंडोर स्टेडियम म उपस्थित नगर निगम कमिश्नर श्री सौरभ कुमार ह कैमरा के जरिया अस्थाई कोविड अस्पताल बर करे गेहे व्यवस्था मन ले उन् मन ल अवगत करावत बताइन कि मरीज मन के बाढ़ती संख्या ल देखत ऑक्सीजन के आवश्यकता पूरा करे बर स्टेडियमेच म ऑक्सीजन प्लांट स्थापित करे गे हवय। ये अस्थाई कोविड अस्पताल म ऑक्सीजन युक्त 286 बिस्तर तियार करे गे हवय,एकर छोड़ 74 आइसोलेशन बेड तको उहां उपलब्ध हे। इहां 219 बेड म ऑक्सीजन कंसनट्रेटर लगाए गेहे हवय, जेमा ऑक्सीजन के संगे —संग नेबुलाइजेशन के सुविधा होही, जेकर बर स्थानीय, समाजसेवी, स्वयंसेवी संस्था अउ दानदाता मन तको अपन सहयोग देहे हवय।