बेमेतरा 19 अप्रैल 2021 सम्मार। मुख्यमंत्री दाउ भूपेश बघेल ह काली अपन घरू कार्यालय म आयोजित वर्चुअल बइठका म प्रदेश के 10 जिला मन म कोरोना संक्रमण के वर्तमान स्थिति अउ उन्कर रोकथाम के उपाय अउर मरीज मन के इलाज बर करे प्रबंध मन के समीक्षा करीन । ये समीक्षा बइठका म बेमेतरा कलेक्टर श्री शिव अनंत तायल, पुलिस अधीक्षक श्री दिव्यांग कुमार पटेल संघरीन । कलेक्टर श्री तायल ह बताइन कि जिला चिकित्सालय म 120 ठन ऑक्सीजन युक्त बिस्तर के बेवस्था हे। नेत्र चिकित्सालय म 40 ठन ऑक्सीजन युक्त बिस्तर के बेवस्था कर लेहे गे हे। एकर छोड़ सामुदायिक स्वास्थ्य केन्द्र खण्डसरा, नवागढ़, साजा, बेरला अउ थानखम्हरिया के सिविल अस्पताल मन म तको 20-20 ठन ऑक्सीजन युक्त बिस्तर के बेवस्था करे गे हे ।
मुख्यमंत्री ह जम्मो कलेक्टर मन ले हवई अड्डा के संगे-संग रेलवे स्टेशन, बस स्टैण्ड अउ अंतर्राज्यीय सीमा मन म बाहिर ले अवइया यात्री मन के कड़ई ले टेस्टिंग करके आवश्यकतानुसार क्वारेंटाइन सेंटर, आइसोलेशन म राखे अउ अस्पताल भेजे के बेवस्था के निर्देश दीन, ताकि इन लोगन ले संक्रमण झन बगरे पावय।
मुख्यमंत्री ह कहीन कि जेन गंवई क्षेत्र मन म जादा संक्रमण के मामले आवत हे,उहां गांवे म हर मनखे के जांच बर विशेष अभियान चलाके टेस्टिंग करे, उन मनल अलग राखे अउ उन्कर मॉनीटरिंग के तको बेवस्था करयं । क्वारेंटाइन अउ होम आइसोलेशन वाले मन ल टेलीमेडिसिन के माध्यम ले सलाह देहे बर कंट्रोल रूम ल सक्रिय करे जाय। चौक -चैराहा मन म भीड़ सकेलावय झन। सबो जिला मन ले लगे अंतर्राज्यीय सीमा सील कर देवयं । दुष्प्रचार करइया मन उपर तको कड़क कार्रवाई करे जाय।
मुख्यमंत्री ह कहीन कि सामाजिक संगठन, उद्योगपति अउ व्यापार जगत के लोगन मन तको संकट के ये बेरा म शासन के संग सहयोग करत हे । कलेक्टर मन तको बेरा —बेरा म कइयोन अइसन वर्ग के लोगन मन ले गोठ —बात करत रहयं । आम जनता के आवश्यक जरूरत मन के पूर्ति म कोनो बाधा झन आए पावय । स्वास्थ्य विभाग के बड़का अधिकारी मन जम्मो जिला मन म जरूरत के अनुसार मेडिकल स्टॉफ के भर्ती तुरते —ताही कर लेवयं ।
मुख्यमंत्री ह वर्चुअल बइठका म रइपुर, दुरूग, राजनांदगांव, बेलासपुर, जांजगीर-चांपा, रायगढ़, बलौदाबाजार, जशपुर, कोरबा अउ बेमेतरा जिला म ऑक्सीजन वाले बिस्तर अउ ऑक्सीजन सिलेण्डर के उपलब्धता, मरीज मन के इलाज, रेमडेसिविर इंजेक्शन के संगे —संग आवश्यक दवई मन के उपलब्धता, सीएसआर मद अउ आने मद मन ले आवश्यक उपकरण मन के बेवस्था के समीक्षा करीन । उन मन जम्मो कलेक्टर मन ल अपन-अपन जिला म ऑक्सीजन सिलेण्डर के सरलग पूर्ति, आवश्यक दवई मन के भण्डारण, खदान अउ औद्योगिक क्षेत्र मन म सघन टेस्टिंग अभियान चलाए के संबंध म आवश्यक निर्देश दीन । बइठका म स्वास्थ्य मंत्री श्री टी.एस. सिंहदेव ह सबो जिला म आवश्यकतानुसार जम्मो व्यवस्था मन ल सुनिश्चित करे के निर्देश दीन । उन मन राज्य म कोविड-19 के संक्रमण के स्थिति अउ वैक्सीनेशन के प्रगति के संबंध म जानकारी दीन।
