मुख्यमंत्री दाउ भूपेश बघेल ह कोरोना ले बचाव के टीका लगवाइन डॉक्टर मन ले टीकाकरण के एक-दू दिन के भीतर उपजइया संभावित स्थिति अउ आवश्यक सावधानी मन के जानकारी लीन

रइपुर, 9 अप्रैल 2021 शुकवार । मुख्यमंत्री दाउ भूपेश बघेल ह आज बिहिनिया रायपुर के पंडित जवाहर लाल नेहरू स्मृति चिकित्सा महाविद्यालय पहुंचके कोविड-19 ले बचाव के टीका के पहली खुराक लीन। उन मन ह टीका लगवाने के पीछू डॉक्टर मन ले टीकाकरण के एक-दू दिन के भीतर उपजइया संभावित स्थिति अउ टीकाकरण के तुरते पीछू रखे जाए सावधानी मन के तको जानकारी लीन । उन मन स्वास्थ्य मंत्री श्री टी.एस. सिंहदेव, स्वास्थ्य विभाग के अपर मुख्य सचिव श्रीमती रेणु जी. पिल्लै अउ कोरोना टीकाकरण के राज्य नोडल अधिकारी डॉ. प्रियंका शुक्ला ले प्रदेश म टीकाकरण के ताजा स्थिति के तको जानकारी लीन ।
मुख्यमंत्री दाउ बघेलेच के संग आज गृहमंत्री श्री ताम्रध्वज साहू अउ उन्कर धर्मपत्नी श्रीमती कमला साहू ह तको कोरोना ले बचाव के टीका लगवाइन। ये बेरा म छत्तीसगढ़ गृह निर्माण मंडल के अध्यक्ष श्री कुलदीप जुनेजा, महापौर श्री एजाज ढेबर, चिकित्सा शिक्षा विभाग के संचालक डॉ. आर.के. सिंह, कलेक्टर डॉ. एस. भारतीदासन, वरिष्ठ पुलिस अधीक्षक श्री अजय यादव, रइपुर मेडिकल कॉलेज के डीन डॉ. विष्णु दत्त, डॉ. भीमराव अम्बेडकर अस्पताल के अधीक्षक डॉ. विनीत जैन अउ मुख्य चिकित्सा अउ स्वास्थ्य अधिकारी डॉ. मीरा बघेल तको मौजूद रिहिन।