रायपुर 11 अप्रैल 2021 इतवार । मुख्यमंत्री दाउ भूपेश बघेल ह हवाई मार्ग संग रेल मार्ग ले आने राज्य मन ले छत्तीसगढ़ अवइया यात्री मन बर आरटीपीसीआर टेस्ट के 72 घंटा के भीतर के निगेटिव रिपोर्ट ल अनिवार्य करे के निर्देश अधिकारी मन ल दिए हवय। उन मन बिना निगेटिव रिपोर्ट के अवइया यात्री मन के जांच अउ उन मन ल एसओपी के अनुसार क्वारेंटिन, कोविड केयर सेंटर या अस्पताल म रखे के व्यवस्था तको करे बर कहीन । उन्होंने प्रदेश म रेमडेसीवीर इंजेक्शन के सुचारू आपूर्ति बर मुख्य सचिव ल निर्देश दीन हवय कि ये दवई के उत्पादन करइया कम्पनी मन संग समन्वय बर बड़का अधिकारी मन ल हैदराबाद अउ महाराष्ट्र भेजा जावय। मुख्यमंत्री ह ड्रग एसोसिएशन के अध्यक्ष ले चर्चा करके उन्कर ले आने राज्य मन ले रेमडेसीवीर इंजेक्शन के आपूर्ति बढ़ाए बर कहीन । मुख्यमंत्री ह प्रदेश म कोविड-19 के बाढ़त संक्रमण ले उपजे परिस्थिति मन उपर चिकित्सा विशेषज् मन ले वीडियो कॉन्फ्रेंस ले चर्चा के बाद ये निर्देश दीन । उन मन अस्पताल संचालक, चिकित्सा विशेषज्ञ अउ इंडियन मेडिकल एसोसिएशन के प्रतिनिधि मन ले चर्चा करके कोविड-19 के इलाज म आवत दिक्कत, ऑक्सीजन अउ जरूरी दवई मन के आपूर्ति के संबंध म जानकारी लीन ।
हवाई मार्ग संग रेल ले छत्तीसगढ़ अवइया मन बर 72 घंटे के भीतर के आरटीपीसीआर निगेटिव रिपोर्ट होही जरूरी
बिना निगेटिव रिपोर्ट के अवइया मन के होही जांच, एसओपी के अनुसार क्वारेंटाईन सेंटर या आइसोलेशन म रखे जाही
ऑक्सीजन अउ आईसीयू बेड अउ वेन्टीलेटर बढ़ाए बर विधायक निधि अउ औद्योगिक घराना मन ले लेेहे जाही मदद
मुख्यमंत्री ह अस्पताल संचालक अउ चिकित्सा विशेषज्ञ मन ले वीडियो कॉन्फ्रेंस ले करीन चर्चा
वीडियो कॉन्फ्रेंस म स्वास्थ्य मंत्री श्री टी.एस. सिंहदेव तको संघरीन । मुख्यमंत्री निवास म मुख्य सचिव श्री अमिताभ जैन, स्वास्थ्य विभाग के अपर मुख्य सचिव श्रीमती रेणु जी. पिल्ले, मुख्यमंत्री के सचिव श्री सिद्धार्थ कोमल परदेशी, संचालक स्वास्थ्य श्री नीरज बंसोड़, राष्ट्रीय स्वास्थ्य मिशन के संचालक डॉ. प्रियंका शुक्ला अउ नियंत्रक खाद्य अउ औषधि प्रशासन श्री के.डी. कुंजाम तको उपस्थित रिहिन । अपर मुख्य सचिव गृह श्री सुब्रत साहू के संगे संग रइपुर, बिलासपुर अउ दुरूग के कइयोन चिकित्सा विशेषज्ञ, तीनों जिला के कलेक्टर, इंडियन मेडिकल एसोसिएशन अउ ड्रग एसोसिएशन के प्रतिनिधि वीडियो कॉन्फ्रेंस ले चर्चा म शामिल होइन ।
