मुख्यमंत्री श्री भूपेश बघेल ह करिस वरिष्ठ अधिवक्ता मन के सम्मान
महाधिवक्ता कार्यालय के वेबसाईट अऊ मोबाईल एप के शुभारंभ
बिलासपुर, मुख्यमंत्री श्री भूपेश बघेल आज हाईकोर्ट परिसर बिलासपुर म आयोजित 50 साल के विधि व्यवसाय के सेवा अवधि पूरा करइया अधिवक्ता मन के सम्मान समारोह म पहुंचिन। उमन वरिष्ठ अधिवक्ता मन ल शॉल, श्रीफल अऊ स्मृति चिन्ह देके सम्मानित करिन। ये बेरा म श्री बघेल ह कहिन कि पीडि़त मन ल न्याय देवाए म अधिवक्ता मन के महत्वपूर्ण योगदान रहिथे। आप मन सबो के सम्मान करके मैं खुद ल गौरवान्वित महसूस करत हंव। मोला बहुत खुशी होइस कि मोला आप मन के सम्मान करे के अवसर मिलीस। समारोह म पचास साल के विधि व्यवसाय के सेवा पूरा कर चुके करीबन पचपन वरिष्ठ अधिवक्ता मन के सम्मान करे गीस।
श्री बघेल ह कहिन कि कोनो पीडि़त कोर्ट आथे त ओखर बात मजबूती ले रखे के काम अधिवक्ता ही करथे। अधिवक्ता मन के वजह ले पीडि़त बर न्याय प्रक्रिया सरल हो जाथे। मुख्यमंत्री ह कहिन कि गरीब मन ल सस्ता न्याय कइसे मिलय ये म विचार करे के जरूरत हे। गरीब पीडि़त मन ल सस्ता अऊ सुलभ न्याय उपलब्ध हो सकय एखर खातिर घलोक कार्यशाला मन के आयोजन होना चाही।
श्री बघेल ह कहिन कि नेता, अधिवक्ता अऊ डॉक्टर कभू रिटायर नइ होवय। आप मन सबो ह लंबा समय तक पीडि़त मन के पक्ष न्यायालय म रखे हव। ए खातिर मैं कामना करथंव के आप मन सबो वरिष्ठ अधिवक्ता सुखी अऊ स्वस्थ जीवन जियव अऊ पीडि़त मन ल न्याय देवात रहव।
कार्यक्रम म मुख्य न्यायाधीश श्री पी. आर. रामचंद्र मेनन ह कहिन कि वरिष्ठ मन के सम्मान करना हमर परंपरा हे। जब मैं ह वकालत के शुरुआत करेंव त हमेशा अपन वरिष्ठ अधिवक्ता मन के सम्मान करेंव। कोर्ट म अपन बात रखे ले पहिली अधिवक्ता मन ल बहुत तैयारी करना परथे। ये मां वरिष्ठ अधिवक्ता मन के महत्वपूर्ण भूमिका रहिथे। वरिष्ठ मन ले हमेशा न्याय प्रणाली के बारीकी सीखे ल मिलथे। सीखना एक अनंत प्रक्रिया हे। कोनो क्षेत्र म होही हमेशा अपन वरिष्ठ मन ले सीखते रहना चाही। अपन ले वरिष्ठ मन ल हमेशा गुरु के जइसे ही देखना चाही। आप मन सबो वरिष्ठ अधिवक्ता मन ह पचास साल तक जऊन पीडि़त मन ल न्याय देवाए हव वो प्रशंसनीय हे। मैं आप मन सबो के स्वस्थ जीवन के कामना करत हंव।
एखर पहिली मुख्यमंत्री श्री भूपेश बघेल ह हाईकोर्ट परिसर स्थित महाधिवक्ता कार्यालय म दूसर अऊ तीसर तल के निर्माण के शिलान्यास अऊ महाधिवक्ता कार्यालय के वेबसाईट, मोबाईल एप के लोकार्पण अऊ समस्त नस्ति मन अऊ कागद मन के डिजिटलाईजेशन के शुभारंभ करिस। उमन महाधिवक्ता कार्यालय म सभाकक्ष अऊ नवनिर्मित विधि अधिकारी कक्ष मन के उद्घाटन घलोक करिन।
न्यायाधीश श्री प्रशांत मिश्रा, न्यायाधीश श्री मनींद्र मोहन श्रीवास्तव, मंत्री श्री ताम्रध्वज साहू अऊ श्री मोहम्मद अकबर ह वरिष्ठ अधिवक्ता मन ल शुभकामना दीन। उमन कहिन कि महाधिवक्ता कार्यालय के वेबसाईट अऊ एप के शुरु होए ले मनखे मन ल प्रकरण मन के जानकारी आसानी ले मिल सकही। जऊन विभाग मन के प्रकरण हाईकोर्ट म चलत हे ओ मन घलोक ऑनलाईन जानकारी देख सकहीं।
कार्यक्रम म न्यायाधीश श्री गौतम भादुड़ी, श्री संजय के. अग्रवाल, श्री पी सैम कोशी, श्री संजय अग्रवाल, श्री राजेंद्र सिंह, श्री शरद कुमार गुप्ता, श्री रामकृष्ण शर्मा, श्री अरविंद सिंह चंदेल, श्री साहू, श्री गौतम चौरडि़या, श्रीमती विमला सिंह, श्रीमती रजनी दुबे, विधायक बिलासपुर श्री शैलेष पांडे, विधायक तखतपुर श्रीमती रश्मि सिंह, अकतहा महाधिवक्ता श्री आलोक बख्शी, प्रशासनिक अधिकारी अऊ आन अधिवक्तागण उपस्थित रहिन।
