साइंस कॉलेज म आयोजित राज्य स्तरीय कार्यक्रम म सामिल होही मुख्यमंत्री श्री विष्णु देव साय ‘कुपोषण मुक्त छत्तीसगढ़ अभियान’ के घलोक होही सुभारंभ
रायपुर, मुख्यमंत्री श्री विष्णु देव साय काली 10 फरवरी के ‘मुख्यमंत्री कन्या विवाह योजना’ के तहत राज्य स्तरीय बिहाव कार्यक्रम म प्रदेस भर के 6 हजार 412 ले जादा जोड़ा मन ला असीरबाद दिही। ए जम्मो जोड़ा मन अपन-अपन धार्मिक परंपरा अऊ रीति-रिवाज के हिसाब ले बिहाव के बंधन म बंधही। मुख्यमंत्री श्री साय ह रायपुर के साइंस कॉलेज मैदान म आयोजित ए कार्यक्रम म “कुपोषण मुक्त छत्तीसगढ़ अभियान” के घलोक सुरूवात करही। ए अभियान के पहिली चरण म 6 महीना ले 52 महीना के उमर वाले 40 हजार कुपोषित लइका मन ला सामिल करे जाही। ए अभियान के सुरूवात बस्तर संभाग ले होही, जेमा बीजापुर, दंतेवाड़ा, नारायणपुर अऊ सुकमा जिला सामिल हें।
ए मौका म कार्यक्रम के अध्यक्षता विधानसभा अध्यक्ष डॉ. रमन सिंह करही। संग म उप मुख्यमंत्री श्री अरुण साव अऊ श्री विजय शर्मा, केंद्रीय मंत्री श्री तोखन साहू, महिला एवं बाल विकास मंत्री श्रीमती लक्ष्मी राजवाड़े समेत मंत्रिमंडल के सदस्य, सांसद, विधायक अऊ दूसर जनप्रतिनिधि मन घलोक मौजूद रहिही।
मुख्य कार्यक्रम राजधानी रायपुर के साइंस कॉलेज मैदान म बिहनिया 11 बजे ले सुरू होही, जिहां 1,316 जोड़ा मन के बिहाव संपन्न होही। ए नवा जोड़ा मन ला योजना के तहत 35 हजार रुपिया ओखर बैंक खाता म मदद के रूप म अऊ 15 हजार रुपिया के सामान अऊ बिहाव के खरचा बर दे जाही। ए कार्यक्रम म बलौदा बाजार, धमतरी, दुर्ग, महासमुंद अऊ राजनांदगांव जिला के जोड़ा मन ऑनलाइन माध्यम ले जुड़ही। बाकी जिला मन म जिला मुख्यालय म सामूहिक बिहाव के आयोजन करे जाही, जिहां प्रभारी मंत्री अऊ स्थानीय नेता मन सामिल होही।
मुख्यमंत्री कन्या विवाह योजना म काली हिंदू रीति ले 6,281, मुस्लिम रीति ले 3, ईसाई रीति ले 113, बौद्ध रीति ले 5 अऊ बैगा समुदाय के 10 जोड़ा मन बिहाव करही। ए योजना के माध्यम ले सरकार ह गरीब परिवार के बेटी मन ला सम्मान के संग बिहाव करे के मौका देवत हे। ए बड़का आयोजन ह समाज म बराबरी अऊ सरकार के जनकल्याण कोति समर्पण ला देखाथे।