मुख्यमंत्री श्री विष्णु देव साय के उपस्थिति मा 6,412 जोड़ा मन के होईस बिहाव
कुपोषण मुक्त छत्तीसगढ़ अभियान के होईस सुभारंभ
रायपुर, मुख्यमंत्री श्री विष्णु देव साय ह कहिन के मुख्यमंत्री कन्या बिहाव योजना छत्तीसगढ़ मा सामाजिक समरसता, अंत्योदय अउ संवेदनशील सासन के भावना ला पूरा करे बर एक ऐतिहासिक पहल आय। उमन कहिन के एक समय गरीब परिवार बर बेटी के बिहाव करना बड़का चिंता के बात रहिस, जेला ए योजना ह सम्मान अउ भरोसा मा बदल देहे हे। मुख्यमंत्री श्री साय ह राजधानी रायपुर के साइंस कॉलेज मैदान मा आयोजित राज्य स्तरीय सामूहिक बिहाव कार्यक्रम ला संबोधित करत रहिन।
मुख्यमंत्री श्री विष्णु देव साय के मौजूदगी मा रायपुर समेत पूरा प्रदेश मा कुल 6,412 जोड़ा मन अलग-अलग धरम अउ रीति-रिवाज के मुताबिक वैवाहिक जीवन मा बंधिन। साइंस कॉलेज मैदान मा 1,316 नवा बिहाता जोड़ा मन ला मुख्यमंत्री ह खुद असीस दीन, जबकि आन जिला के जोड़ा मन ह वर्चुअल माध्यम ले कार्यक्रम मा जुड़िन। योजना के तहत हर नवा जोड़ा ला 35 हजार रूपया के सहायता राशि देहे गीस। जानबा हे के ए ऐतिहासिक कार्यक्रम ला गोल्डन बुक ऑफ वर्ल्ड रिकॉर्ड मा दरज करे गे हे।
मुख्यमंत्री श्री साय ह कहिन के ए आयोजन सिरिफ बिहाव के कार्यक्रम नो हे, भलुक एहा सबो धरम के भाव अउ सामाजिक एकता के तिहार आय। ए बड़े आयोजन मा हिंदू, मुस्लिम, ईसाई, बौद्ध अउ विशेष पिछड़ी जनजाति बैगा समाज के जोड़ा मन अपन-अपन रीति-रिवाज ले बिहाव के बंधन मा बंधिन, जेहा छत्तीसगढ़ के सांस्कृतिक विविधता अउ सामाजिक समरसता ला देखाथे।
मुख्यमंत्री श्री साय ह ए मऊका मा कुपोषण मुक्त छत्तीसगढ़ अभियान के घलो सुभारंभ करीन। उमन बताइन के पायलट प्रोजेक्ट के रूप मा सरगुजा अउ बस्तर संभाग के आठ जिला मन मा ए अभियान के सुरूआत करे गे हे। मुख्यमंत्री ह कहिन के स्वस्थ अउ सुपोषित छत्तीसगढ़ बनाए खातिर सासन के संग समाज के घलो मदद जरूरी हे अउ ए अभियान के सफलता के बाद एला पूरा प्रदेश मा लागू करे जाही।
मुख्यमंत्री श्री साय ह कहिन के प्रदेश के मनखे मन के असीस ले छत्तीसगढ़ ह तेजी ले विकास के रद्दा मा आगू बढ़त हे। उमन बताइन के सरकार ह दू बछर मा ही मोदी के गारंटी के जादातर वादा मन ला पूरा कर दे हे। महतारी वंदन योजना के तहत 70 लाख ले जादा माई लोगन मन ला हर महीना 1,000 रूपया के मदद देहे जात हे। उमन तेंदूपत्ता सकेया मन बर मानक बोरा के दाम मा बढ़ोतरी, चरण पादुका योजना के फेर सुरूआत, श्रीरामलला दर्शन योजना अउ भूमिहीन मजूर मन ला आर्थिक सहायता जइसे जनकलियाणकारी योजना मन के घलो जिक्र करीन।
महिला अउ बाल विकास मंत्री श्रीमती लक्ष्मी राजवाड़े ह कहिन के मुख्यमंत्री कन्या बिहाव योजना के सुरूआत पूर्व मुख्यमंत्री डॉ. रमन सिंह के अगुवाई मा करे गे रहिस, जेला मुख्यमंत्री श्री विष्णु देव साय ह आगू बढ़ावत हें। उमन कहिन के सरकार योजना मन ला आखिरी मनखे तक पहुंचाए बर सरलग उदीम करत हे अउ कुपोषण मुक्त छत्तीसगढ़ के लक्छ मा मनखे मन के मदद जरूरी हे।
कौशल विकास मंत्री गुरु खुशवंत साहेब ह एला ऐतिहासिक दिन बतावत कहिन के एकेच दिन मा हजारों जोड़ा मन के बिहाव मुख्यमंत्री के संवेदनशीलता अउ सब ला संग लेके चले के सोंच के परमान आय।
कार्यक्रम मा विधायक श्री सुनील सोनी, श्री पुरंदर मिश्रा, श्री अनुज शर्मा, श्री मोतीलाल साहू, श्री संपत अग्रवाल, छत्तीसगढ़ बीज निगम के अध्यक्ष श्री चंद्रहास चंद्राकर अउ बाल संरक्षण आयोग के अध्यक्ष डॉ. वर्णिका शर्मा, महिला अउ बाल विकास विभाग के सचिव श्रीमती शम्मी आबिदी, संचालक डॉ. रेणुका श्रीवास्तव संग जनप्रतिनिधि अउ अधिकारी-करमचारी मन उपस्थित रिहिन।
