मुख्यमंत्री दाउ बघेल करीन मितानिन मन ले गोठबात, कहीन- आपातकाल म सकारात्मक भूमिका निभावत हें

धमतरी 01 मई 2021 शनिच्चर। प्रदेश के मुख्यमंत्री दाउ भूपेश बघेल ह आज रइपुर अउ दुरूग संभाग जम्मो जिला के मितानिन अउ स्वास्थ्य कार्यकर्ता मन ले वीडियो काॅन्फ्रेंसिंग ले गोठ बात करत कोरोना काल म उन्कर कोति ले करे जावत प्रयास ल सहराइन अउ गांव म उन्कर सकारात्मक भूमिका बर आभार प्रकट करीन। मुख्यमंत्री ह धमतरी विकासखण्ड के ग्राम पंचायत भटगांव संग नगर निगम के गोकुलपुर वार्ड अउ रामसागरपारा म कार्यरत मितानिन मन ले गोठबात करके उन्कर बूता मन के बारे म जानकारी लीन । वीडियो काॅन्फ्रेंसिंग के बेरा कलेक्टर श्री जयप्रकाश मौर्य अउ जिला पंचायत के सी.ई.ओ. श्री मयंक चतुर्वेदी संघरे रिहिन।
मुख्यमंत्री कोति ले लेहे गे वीडियो वार्ता म रइपुर अउ दुरूग संभाग के मितानिन अउ स्वास्थ्य कार्यकर्ता संघरीन, जेमा उन मन ओसरी पारी करीन ।
मुख्यमंत्री के पूछे म भटगांव के मितानिन श्रीमती टामेश्वरी अउ ओमेश्वरी ह बताइन कि उन्कर क्षेत्र म 46 लोग संक्रमित हे जेमा 06 कोविड केयर सेंटर म अउ बाचे 40 मरीज आइसोलेशन म हे । उन मन बताइन कि स्वास्थ्य विभाग के निर्देशानुसार हमन घर-घर जाके लक्षण आधारित मरीज मन के सर्वे करके सूची तैयार करके बीएमओ ल जानकारी देथन । गांव वाले मन ल मास्क लगाए बर , घेरी-बेरी हाथ धोए अउ दू गज दूरी बनाए रखे के सरलग समझाइश देथन।ओइसनेहे स्थानीय गोकुलपुर वार्ड मितानिन श्रीमती मुक्तिरानी अउ रामसागर पारा वार्ड के श्रीमती प्रमिला ह मुख्यमंत्री ल बताइन कि लक्षण वाले मरीज मन के जांच रिपोर्ट आए के पहिली अपन मितानिन पेटी के दवई आइवरमेक्टिन, डोक्सीसाइक्लिन, पैरासिटामाॅल, विटामिन सी अउ जिंक के गोली नियमानुसार खाए बर देथन । संगे —संग परिवार के बाकी सदस्य मन ले मरीज से दूरी बनाके गरारा करे, भाप लेहे अउ काढ़ा पीए के तको सलाह देथन । एमा मुख्यमंत्री ह मितानिन मन के उदीम ल सहराइन।
ये बेरा म मुख्यमंत्री दाउ बघेल कहीन कि वैश्विक आपदा के ये बेरा म स्वास्थ्य विभाग के निर्देशानुसार मितानिन मन संक्रमण के परवाह करे बिगर अपन जिम्मेदारी अबड़े निभावत हे । स्वाथ्यगत आपदाकाल म जइसे डाॅक्टर मन भगवान के भूमिका निभाथे वइसनेहेच मितानिन मन देवी ले कम नइ हे ।