कॉमन सर्विस सेंटर ले मिलीस सरलग कमई के रद्दा
मुंगेली, छत्तीसगढ़ सासन कोति ले चलत ‘मुख्यमंत्री कौशल विकास योजना’ गांव-देहात के युवा मन के जिनगी बदले के एक मजबूत जरिया बनत हे। ए योजना के तहत अलग-अलग कोर्स म ट्रेनिंग देके लइका मन ला रोजगार अउ स्वरोजगार ले जोड़े जावत हे। इही कड़ी म, मुंगेली जिला के ग्राम जल्दा के रहइया श्री जीवन सिंह बैगा ह कौशल प्रशिक्षण पाके आत्मनिर्भर बने कोति एक बड़का कदम बढ़ाए हे। ओहा मुख्यमंत्री कौशल विकास योजना के तहत जिला परियोजना लाइवलीहुड कॉलेज जमकोर म आईटी (IT) सेक्टर के ‘डोमेस्टिक डाटा एंट्री ऑपरेटर’ कोर्स के ट्रेनिंग लीस। ए ट्रेनिंग के बखत ओला कंप्यूटर, ओकर समान मन अउ तकनीकी जानकारी मन ला विस्तार ले सिखाय गीस।
श्री बैगा ह बताइन के ओला ए ट्रेनिंग के जानकारी एक ठन शिविर ले मिलीस, जेखर बाद ओहा सबो जरूरी प्रक्रिया ला पूरा करके सही तरीका ले अपन ट्रेनिंग पूरा करिस। ट्रेनिंग म मिले मार्गदर्शन अउ व्यावहारिक गियान ह ओला अपन गोड़ म खड़ा होय बर भरोसा दीस। ट्रेनिंग पूरा होय के बाद, श्री जीवन सिंह बैगा ह स्वरोजगार के रूप म अपन गांव म सीएससी (कॉमन सर्विस सेंटर) सुरू करिस।
अभी के बखत में, ओहा इही सेंटर के माध्यम ले न केवल अपन बल्कि अपन पूरा परिवार के सही तरीका ले गुजारा करत हे। स्वरोजगार ले ओला हर महीना सरलग कमई होवत हे, जेखर से ओकर आर्थिक स्थिति अउ रहन-सहन म सुधार आय हे। श्री जीवन सिंह बैगा ह अपन ए सफलता के श्रेय कौशल विकास विभाग, लाइवलीहुड कॉलेज मुंगेली अउ जिला प्रशासन ला देथे। ओहा मुख्यमंत्री श्री विष्णुदेव साय ला धन्यबाद देवत कहिथे के ए योजना ह हमर जइसे ग्रामीण युवा मन बर रोजगार अउ आत्मनिर्भरता के एक मजबूत आधार आय।