छोटे किसान मन के धान अभियान चलाके खरीदे बर कलेक्टर मन ल दीन निर्देश
रायपुर, मुख्यमंत्री श्री भूपेश बघेल के निर्देश म खाद्य विभाग कोति ले किसान मन के शत-प्रतिशत धान सुविधाजनक रूप ले खरीदे बर लिमिट के व्यवस्था ल शिथिल कर दे गए हे। अब समिति मन अपन सुविधा अऊ कांटा तराजू अउ मानव श्रम के उपलब्धता के मुताबिक किसान मन ले रोजेच जादा ले जादा मात्रा म धान खरीदहीं। मुख्यमंत्री ह प्रदेश के सबो कलेक्टर मन ल छोटे अउ सीमांत किसान मन के धान प्राथमिकता के आधार म अभियान चलाके खरीदे बर जरूरी कार्रवाई करे के निर्देश दिए हें। मुख्यमंत्री ह कहे हें कि सीमांत अऊ छोटे किसान मन ल धान बेचे बर घेरी-बेरी खरीदी केन्द्र मन म झन आना परय। राज्य के किसान मन ल कोनो प्रकार के चिंता करे के जरूरत नइ हे। उमन कहिन कि राज्य के किसान मन के 15 क्विंटल प्रति एकड़ के हिसाब ले पूरा धान खरीदे जाही। जरूरत परही त धान खरीदी के समय अऊ खरीदी किस्त के संख्या घलोक बढ़ाए जाही। खाद्य विभाग के सचिव ह बताइस कि सबो धान खरीदी केन्द्र मन के नियमित जांच करे जात हे। धान खरीदी के भुगतान ऑनलाइन होवत हे अऊ अब तक ग्यारह सौ करोड़ रूपिया ले जादा के भुगतान किसान मन ल करे जा चुके हे।