रइपुर, 20 अप्रैल 2021 मंगल। मुख्यमंत्री दाउ भूपेश बघेल के मार्गदर्शन म कोरोना जांच के संख्या म वृद्धि, मरीज मन के तुरते इलाज अउ वैक्सीनेशन ले कोरोना नियंत्रण के प्रयास करे जावत हे । राज्य म कोरोना गाइडलाइन के पालन के संगे —संग कंटेन्मेंट जोन अउ लॉकडाउन के माध्यम ले तको कोरोना के बगरई ल थाम्हे के पहल करे जावत हे। ये सब उदीम मन ले प्रदेश म कोरोना संक्रमित मन के संख्या म कमती आये हे । कोरोना पीड़ित मन ल राहत पहुंचाए बर मुख्यमंत्री दाउ बघेल के निर्देश म जिला प्रशासन कोति ले जिला अउ विकासखण्ड स्तर म स्थित कोविड केयर सेंटर मन म वेंटिलेटर, आईसीयू अउ ऑक्सीजन बेड के बेवस्था सुनिश्चित करे जावत हवय । एकर छोड़ उपराहा कलेक्टर मन के माध्यम ले मरीज मन ल प्राथमिकता के तौर म रेमडेसिविर इंजेक्शन अउ आवश्यक दवई मन ल उपलब्ध करवाए जावत हे ।
कोरोना संक्रमण के फैलाव ल थाम्हे अउ पीड़ित मन के तुरते इलाज बर आवश्यकता अनुसार उन मन ल क्वारेंटाइन सेंटर अउ आइसोलेशन केेन्द्र म राखे के व्यवस्था तको करे गे हे । जांजगीर-चांपा जिला म पाछू दिन डॉक्टर मन के बने इलाज अउ जिला प्रशासन के बने प्रबंधन के सेति होम आइसोलेशन म कोरोना के इलाज ले 425 मरीज मन ह कोरोना ल हरोइन हे । येह जिला अउ प्रदेश बर बड़े उपलब्धि हरे जोन कोरोना ल हराए बर आसरा ल जगाथे ।
इही किसम ले जांजगीर-चांपा जिला के पामगढ़ अनुविभाग के एसडीएम श्री करूण डहरिया ह जनसहयोग के माध्यम ले कोविड केयर सेंटर खोले के सहराए के लाइक पहल करे हे, एकर बर उन मन अपन एक महीना के वेतन देहे के घोषणा करे हे । उन मन 50 बेड सर्वसुविधायुक्त कोविड केयर सेंटर तैयार करे बर समाज सेवी अउ आम नागरिक मन ले तको सहयोग करे के अपील करे हवय ।
कबीरधाम (कवर्धा) जिला म कोरोना संक्रमण ल थाम्हे बर अउ पीड़ित मन के इलाज बर आवश्यक आने व्यवस्था उपलब्ध करवाए बर चिकित्सा दल अउ जिला प्रशासन कोति ले सुग्ध्घर प्रबंधन करेे जावत हे ।