नगरनार स्टील प्लांट के ग्रुप-सी अऊ ग्रुप-डी के भर्ती परीक्षा अब दंतेवाड़ा म लेहे जाही
स्टील प्लांट के मुख्यालय हैदराबाद के जगा नगरनार म खुलही
रायपुर, मुख्यमंत्री श्री भूपेश बघेल के प्रयास ले बस्तर ल दू सौगात मिलही। एनएमडीसी के नगरनार स्टील प्लांट के ग्रुप-सी अऊ ग्रुप-डी के भर्ती के परीक्षा अब दंतेवाड़ा म लेहे जाही। अइसनहे नगरनार स्टील प्लांट के मुख्यालय हैदराबाद के जगा नगरनार म स्थापित करे जाही।
हम आप ल बता देवन के मुख्यमंत्री श्री भूपेश बघेल ले कल संझा एनएमडीसी के चेयरमैन सह प्रबंध संचालक श्री एन. बैजेन्द्र कुमार ह मुलाकात करे रहिस। ए बेरा के गोठ-बात म ये जबर फैसला लेहे गीस। मुख्यमंत्री के सुझाव ल चेयरमैन श्री एन.बैजेंद्र कुमार ह तुरंते स्वीकार कर लीस। अब नगरनार स्टील प्लांट के मुख्यालय हैदराबाद म न ही भलुक नगरनार म ही होही।
अइसनहे मुख्यमंत्री श्री भूपेश बघेल ह कहे रहिन कि एनएमडीसी छत्तीसगढ़ राज्य के स्थानीय युवा मन ल अपन कंपनी म मौका देवय अऊ भर्ती परीक्षा स्थानीय स्तर म करावय, ताकि जादा ले जादा बस्तर के युवा मन ये मां सामिल हो सकयं। मुख्यमंत्री के ए सलाह म अमल करत एनएमडीसी के चेयरमैन श्री एन. बैजेंद्र कुमार ह नगरनार स्टील प्लांट के ग्रुप-सी अउर ग्रुप-डी कार्मिक मन के भर्ती प्रक्रिया भविष्य म दंतेवाड़ा म कराए के निर्देश दीन।