कलाकार मन ल हर बछर मिलही 24 हजार रुपया तक प्रोत्साहन राशि
रायपुर, छत्तीसगढ़ के लोक कला अउ सांस्कृतिक धरोहर ल सहेजे अउ कलाकार मन ल आर्थिक सहारा देहे खातिर ‘मुख्यमंत्री लोक कलाकार प्रोत्साहन योजना-2026’ के तहत आवेदन मंगाए गे हे। ए योजना म नृत्य-संगीत, लोक नाट्य, लोकगाथा, छत्तीसगढ़ी गीतकार, बाजा बजईया, शिल्पकार, पारंपरिक व्यंजन अउ सिंगार कला ले जुड़े कलाकार मन आवेदन कर सकथें।
योजना के लाभ लेहे बर कलाकार मन के ‘चिन्हारी पोर्टल’ म पंजीयन होना जरूरी हे। चुने गए कलाकार मन ल हर बछर 12 हजार ले 24 हजार रुपया तक के प्रोत्साहन राशि ई-पेमेंट के जरिए एकमुश्त देहे जाही। योजना बर उही कलाकार पात्र होही, जेखर जम्मो स्रोत ले सालाना आमदनी 96 हजार रुपया ले जादा नइ हे।
इच्छुक कलाकार मन निर्धारित प्रारूप म आवेदन भरके, संग म आय प्रमाण-पत्र, बैंक खाता के जानकारी, आईएफएससी कोड अउ पैन कार्ड के फोटोकॉपी लगाके 31 अगस्त 2026 तक पंजीकृत डाक ले ‘संचालक, संस्कृति एवं राजभाषा संचालनालय, छत्तीसगढ़ गृह निर्माण मंडल, व्यावसायिक परिसर, द्वितीय तल, सेक्टर-27, नवा रायपुर, अटल नगर – 492018’ के पता म भेज सकथें। आवेदन फार्म विभाग के वेबसाइट अउ नवा रायपुर स्थित कार्यालय ले घलो प्राप्त करे जा सकत हे।