मुख्यमंत्री नोनी सशक्तीकरण सहायता योजना
श्रमिक परिवार के 5981 बेटी मन के खाता म आइस 11 करोड़ 96 लाख ले जादा के रकम
महासंमुद, 02 अगस्त 2024। मुख्यमंत्री श्री विष्णु देव साय के अगुवई म प्रदेश सरकार श्रमिक मन के हित के बहुत अकन कल्याणकारी योजना संचालित करे जात हे। प्रदेश सरकार ह श्रमिक परिवार मन के बेटी मन के जीवन स्तर म सुधार के उद्देश्य ले मुख्यमंत्री नोनी सशक्तिकरण सहायता योजना के शुरुआत करे हे। श्रम मंत्री श्री लखन लाल देवांगन ह विभागीय योजना मन के जादा ले जादा लाभ उपलब्ध बर श्रम विभाग के अधिकारी मन ल निर्देश देहे हें। ए योजना के उद्देश्य श्रमिक परिवार मन के बेटी मन ल आर्थिक सहायता प्रदान करना हे ताकि ओ मन शिक्षा अऊ आन जरूरत मन ल पूरा कर सकंय।
महासंमुद जिला म ए योजना के तहत कुल 5981 हितग्राही मन के बेटी मन ल लाभान्वित करे गए हे। हर एक बेटी के बैंक खाता म 20,000 रूपिया जमा करे गए हे। ए प्रकार, कुल 11 करोड़ 96 लाख 20 हजार रूपिया के भुगतान करे गए हे। ये राशि वो परिवार मन बर एक महत्वपूर्ण सहारा साबित होवत हे जेन आर्थिक तंगी के सेती अपन बेटी मन के शिक्षा अऊ आन जरूरत मन ल पूरा करे म कठिनाई के सामना करत रहिन।
नोनी सशक्तिकरण सहायता योजना ले न केवल श्रमिक परिवार मन ल राहत मिलत हे, भलुक ये ज़िला के बेटी मन ल आत्मनिर्भर अऊ सशक्त बनाए के दिशा म घलोक एक महत्वपूर्ण कदम साबित होवत हे। एखर से प्रदेश म बालिका मन के शिक्षा अऊ ऊंखर पूरा विकास ल बढ़ावा मिलत हे।
महासमुंद के अयोध्या नगर निवासी हितग्राही गीता निषाद ह बताइस के ए योजना के राशि वोखर बैंक खाता म आ गए हे। वो ह बताइस के ए राशि के उपयोग कॉलेज के पढ़ाई म खर्च करही। वो ह ए सहायता बर मुख्यमंत्री के आभार व्यक्त करिस अऊ कहिस के ये राशि वोकर शिक्षा ल आगू बढ़ाए म मददगार साबित होही। शासन के ए योजना ले ओखर परिवार बहुत खुश हे। महासंमुद जिला म मुख्यमंत्री नोनी सशक्तीकरण सहायता योजना के शुरू होए ले अब तक 5981 पात्र हितग्राही मन के बेटी मन बर 20-20 हजार रूपिया के राशि सीधा ऊंखर बैंक खाता म डाले गए हे। ए योजना के सेती श्रमिक मन के बेटि मन अब सशक्त अउ आत्मनिर्भर घलोक बनत हें।
ये वाले योजना लाभार्थि मन ल आर्थिक सहायता के साथ-साथ सामाजिक सहायता घलोक प्रदान करत हे। श्रमिक परिवार के बेटी मन ल शिक्षा, रोजगार, स्वरोजगार के संग ही ऊंखर बिहाव म ये राशि मजबूत सहायता प्रदान करत हे। ए योजना म छत्तीसगढ़ भवन अउ आन सन्निर्माण कर्मकार कल्याण मण्डल म पंजीकृत श्रमिक ही पात्र हे। पात्रधारी मन ल योजना के लाभ लेहे बर मुख्यमंत्री नोनी सशक्तीकरण सहायता योजना के अधिकारिक वेबसाइट म ऑन लाइन पंजीयन करना होही। श्रमिक परिवार के बेटी मन ल आत्मनिर्भर बनाए के उद्देश्य ले अउ ओ मन ल शिक्षा अऊ रोजगार बर आर्थिक सहायता प्रदान करे बर राज्य सरकार ह मुख्यमंत्री नोनी सशक्तीकरण सहायता योजना के तहत पात्र श्रमिक परिवार के पहिली दू बेटी मन ल आत्मनिर्भर अउ सशक्त बनाए बर 20-20 हजार रूपिया के आर्थिक सहायता राशि सीधा ऊंखर बैंक खाता म डालत हे। ए योजना म श्रमिक/मजदूर परिवार के बेटी जेकर उमर 18 साल ले 21 साल के होही अउ वो अविवाहित होही ओ मन ल 20-20 हजार रूपिया के आर्थिक सहायता देहे जात हे।
