रइपुर, 9 अप्रैल 2021 शुकवार । मुख्यमंत्री दाउ भूपेश बघेल ह आज इहां अपन निवास परिसर ले ‘रोको अउ टोको‘ अभियान के शुभारंभ करीन। कोविड संक्रमण थाम्हे बर, शत-प्रतिशत टीकाकरण सुनिश्चित करे बर अउ लोगन मन ल कोविड अनुरूप व्यवहार ल सुनिश्चित करे के उद्देश्य ले ये अभियान प्रारंभ करे गइस। मुख्यमंत्री दाउ बघेल ह कहीन कि यूनिसेफ के संग रायपुर जिला प्रशासन अउ समाज सेवी संगठन ‘समर्थ‘ कोति ले संयुक्त रुप से प्रारंभ करे गेहे ये अभियान के तहत 600 वालेंटियर रायपुर नगर निगम के 70 वार्ड म झुग्गी बस्ती मन म, कतकोन अकन मोहल्ला मन म अउ अपार्टमेंट म जाके लोगन ल सामाजिक दूरी के पालन करना, मास्क के उपयोग करना, हाथ के साफ सफई के ध्यान रखना अउर वैक्सीनेशन कराए बर प्रेरित करहीे। ये अभियान म धर्म गुरु मन के, कतको सामाजिक संगठन मन के, जनप्रतिनिधि मन के तको सहयोग लेहे जाही।
मुख्यमंत्री ह विश्वास प्रकट करीन कि प्रदेशवासी मन ये अभियान ल गंभीरता से लेंहीं अउ कोविड अनुरूप आचरण ल अपनाही अउ दूसर मन ल तको एकर बर प्रेरित करहीं। दाउ बघेल ह ये बेरा म संघरे लोगन मन ल कोविड अनुरूप व्यवहार के पालन करे के शपथ दिलाईन।
मुख्यमंत्री ह ये अभियान के थीम सांग लॉन्च करीन अउ ये अभियान के तहत लोगन ल कोविड अनुरूप व्यवहार अपनाए के संदेश पोस्टर मन के माध्यम ले देहे वाले बैटरी चलित 10 वाहन मन ल झण्डी देखाके रइपुर नगर निगम के वार्ड मन म घूमे बर रवाना करीन। ये अभियान तीन माह तक चलाए जाही।
मुख्यमंत्री ह रायपुर नगर निगम क्षेत्र म करीन ‘रोको अउ टोको‘ अभियान के शुभारंभ : कोरोना संक्रमण ले बचाव के उपाय बताए बर 600 वालेंटियर जाही घरो-घर
