राष्ट्रीय परिवार स्वास्थ्य सर्वेक्षण म कुपोषण के दर 6.4 प्रतिशत कम होके 31.3 प्रतिशत होइस
महिला अऊ लइका मन के पोषण अऊ स्वास्थ देखभाल ले मिलिस सकारात्मक परिणाम
रायपुर, मुख्यमंत्री श्री भूपेश बघेल के नेतृत्व म कुपोषण मुक्ति बर शुरू करे मुख्यमंत्री सुपोषण अभियान के सकारात्मक परिणाम आगू आए हे। पाछू तीन बछर म प्रदेश के करीबन दू लाख 11 हजार लइका कुपोषण के चक्र ले बाहिर आ गे हे। जबकि साल 2019 म ये अभियान के शुरू होत समय कुपोषित लइका मन के संख्या 4 लाख 33 हजार रहिस। ये प्रकार कुपोषित लइका मन के संख्या म 48 प्रतिशत के कमी एक उल्लेखनीय उपलब्धि हे। एखर संगेच योजना के तहत नियमित गरम भोजन अऊ पौष्टिक आहार मिले ले प्रदेश के करीबन 85 हजार महिला मन घलोक एनीमिया मुक्त हो गे हे।
जानबा हे कि साल 2015-16 म जारी राष्ट्रीय परिवार सर्वेक्षण-4 के आंकड़ा देखव त प्रदेश के 5 साल ले कम उमर के 37.7 प्रतिशत लइका कुपोषण अऊ 15 ले 49 साल के 47 प्रतिशत महिला मन एनीमिया ले पीड़ित रहिन। साल 2018 म ये आंकड़ा बढ़के 40 प्रतिशत हो गीस। ये प्रकार साल 2016 ले 2018 के बीच कुपोषण कम होए के बजाय 2.3 प्रतिशत बढ़ गीस। कुपोषित लइका मन म अधिकांश आदिवासी अऊ दूरस्थ वनांचल के रहिन। राज्य सरकार ह एला चुनौती के रूप म लेत मुख्यमंत्री सुपोषण अभियान के शुरूआत 2 अकटूबर 2019 ले करिस।
