दुनों परियोजना मन ले लगभग 7 लाख हेक्टेयर जमीन म हो सकही सिंचाई
बस्तर के चहुमुखी विकास बर अहम् साबित होही परियोजना
दिल्ली, मुख्यमंत्री श्री विष्णु देव साय ह प्रधानमंत्री श्री नरेन्द्र मोदी ले बहुउद्देशीय बोधघाट बांध परियोजना अऊ इंद्रावती-महानदी इंटरलिंकिंग परियोजना के राष्ट्रीय परियोजना के रूप म निर्माण के संबंध म विस्तार ले चर्चा करे हें।
उमन कहिन के बस्तर संभाग अड़बड़ समे ले नक्सल प्रभावित रहे हे, ते पाए के संभाग ह सिंचाई साधन मन के विकास म पिछड़ गए हे, संभाग म सिंचाई साधन मन के समस्या ल दूर करे अऊ चहुमुखी विकास ल बढ़ावा देहे बर छत्तीसगढ़ सरकार बहुउद्देशीय बोधघाट बांध परियोजना अऊ इंद्रावती-महानदी लिंक परियोजना उपर काम करत हे।
मुख्यमंत्री ह कहिन हे के बस्तर क्षेत्र के चहुमुखी विकास बर बोधघाट बहुउद्देशीय बांध परियोजना निर्णायक परियोजना साबित होगी। ये परियोजना, अड़बड़ दिन ले इन्द्रावती नदी म प्रस्तावित हे। इंद्रावती, गोदावरी नदी के बड़का सहायक नदी ये। गोदावरी जल विवाद अभिकरण के साल 1980 के अवॉर्ड म घलोक आन योजना मन के संग ए परियोजना के उल्लेख हे। ए अवॉर्ड उपर निरधारित आन परियोजना मन के क्रियान्वयन दूसर राज्य मन कर डरे हें फेर दूरस्थ अंचल म होए अउ नक्सल समस्या के कारण ए परियोजना ल चालू नइ करे जा सके हे।
बस्तर के विकास के रफ्तार होगी डबल
बहुउद्देशीय बोधघाट बांध परियोजना ले संभाग म सिंचाई साधन मन के दायरा बाढ़े के संगेच बस्तर के विकास ल डबल रफ्तार मिलही। ए परियोजना ले 125 मेगावाट के विद्युत् उत्पादन, 4824 टन वार्षिक मत्स्य उत्पादन जइसे अकतहा रोजगार, खरीफ अउ रबी मिलाके 3,78,475 हेक्टेयर म सिंचाई विस्तार अउ 49 मि.घ.मी पेयजल के उपलब्धता सुनिश्चित हो सकही। उहें इंद्रावती- महानदी इंटरलिंकिंग परियोजना ले कांकेर जिला के घलोक 50,000 हेक्टेयर जमीन म सिंचाई संग कुल 3,00,000 हेक्टेयर ले जादा जमीन म सिंचाई सुविधा उपलब्ध हो सकही। बस्तर ल विकसित अऊ आत्मनिर्भर बनाए के दिशा म दुनों परियोजना एक महत्वपूर्ण कदम होही।
का हे बहुउद्देशीय बोधघाट बांध परियोजना ?
बहुउद्देशीय बोधघाट बांध परियोजना, गोदावरी नदी के बड़का सहायक इन्द्रावती नदी म प्रस्तावित हे। राज्य म इन्द्रावती नदी कुल 264 कि. मी. म प्रवाहित होथे। ये परियोजना दंतेवाड़ा जिला के विकासखंड अउ तहसील गीदम के ग्राम बारसूर ले लगभग 8 कि.मी. अउ जगदलपुर शहर ले लगभग 100 कि. मी. दूरी म प्रस्तावित हे।
परियोजना के विशेषता
दुनों परियोजना मन के अनुमानित लागत 49000 करोड़ रूपिया हे। जेमां इंद्रावती-महानदी लिंकिन परियोजना के लागत लगभग 20 हजार करोड़ रूपिया अउ बहुउद्देशीय बोधघाट बांध परियोजना म लगभग 29 हजार करोड़ रुपिया के लागत संभावित हे। जेमां हाइड्रोपावर इलेक्ट्रोमैकेनिकल काम, सिविल काम (सिंचाई) घलोक सामिल हे। ए परियोजना म उपयोगी जल भराव क्षमता 2009 मि.घ.मी, कुल जल भराव क्षमता 2727 मि.घ.मी, पूर्ण जल भराव स्तर म सतह के क्षेत्रफल 10440 हेक्टेयर सम्भावित हे।
ए जिला मन ल होही लाभ
बहुउद्देशीय बोधघाट बांध परियोजना ले दंतेवाड़ा, बीजापुर, सुकमा जिला के 269 गांव मन ल बड़का लाभ मिलही। जबकि इंद्रावती-महानदी इंटरलिंकिंग परियोजना ले कांकेर जिला के अनेक गांव मन म सिंचाई सुविधा के विस्तार हो सकही। बस्तर संभाग ल विकसित, आत्मनिर्भर अऊ सक्षम बनाए के दिशा म दुनों परियोजना एक महत्वपूर्ण कदम होही।