मुनगा पाउडर अऊ हल्दी के खेती ले होवत हे बनेच आमदनी
अब तक 3 लाख ले जादा के हो गे हे आमदनी
उत्कृष्ट काम बर मीरा होए हे कई पईत सम्मानित
रायपुर, रायपुर जिला के विकासखंड तिल्दा के ग्राम पंचायत बिलाड़ी के श्रीमति मीरा कन्नौजे बिहान योजना ले जुड़कर उन्नत कृषि कर आर्थिक रूप ले स्वावलंबी बनत हें। मीरा ह औषधिय गुण ले भरपुर अऊ स्वास्थ्य बर अति लाभकारी मुनगा के पत्ति मन ले मुनगा पाउडर के निर्माण करके स्थानीय बाजार म बेंचे जात हे जेखर से वोला बनेच आमदनी होवत हे। संगेच ओ ह हरदी के खेती घलोक करत हे।
वो ह बिहान योजना म ग्रामीण स्तर म कई ठन सहायिका मन के रूप म घलोक काम करे हे जेमां ओ ह ग्रामीण महिला मन ल उन्नत खेती के तकनीक सिखाथे। वोकर ये उत्कृष्ठ काम ल कई स्तर म पुरस्कृत घलोक करे गए हे। ओ ल इंदिरा गांधी कृषि विश्वविद्यालय, महिला अऊ बाल विकास विभाग अऊ आन संस्थान मन कोति ले पुरस्कृत करे गए हे।
अभी हाल म मीरा ह आन उत्पाद जइसे कि फल मन ले बने जैम जेली आदि के घलोक निर्माण करत हे। ओला पैकिंग करके स्थानीय बाजार म बेचे जात हे। ए आर्थिक गतिविधि मन ले अब तक मीरा ह 3 लाख रूपिया ले जादा के आय अर्जित कर डरे हे।
मीरा के कहना हे कि बिहान योजना म जुड़े ले पहिली वोखर आर्थिक स्थिति बने नइ रहिस। आज “बिहान” योजना के सहायता ले ओ ल पंजीकृत संस्था मन ले निःशुल्क उन्नत कृषि तकनीक अऊ उत्पाद निर्माण के प्रशिक्षण प्राप्त होए हे जेखर से वो ह अपन आर्थिक स्थिति ल मजबूत करे बर सबो उपलब्ध संसाधन के सहायता ले अपन आजीविका ल तो बढ़ातेच हे, संगेच अपन जइसे कमजोर ग्रामीण महिला मन ल बिहान योजना ले जुड़े के फायदा तको बतावत हे अऊ कृषि के क्षेत्र म प्रशिक्षित करके मुख्य धारा ले जोड़के आर्थिक रूप ले सशक्त बनाए बर प्रयासरत हे। जेखर से वो मन ला आजीविका के अवसर प्राप्त हो सकय व ऊंखर जीवन म सकारात्मक बदलाव आवय।
