मुंगेली, 27 मार्च 2020। जिला कलेक्टेर अउ जिला दंडाधिकारी श्री नरेंद्र सर्वेश्वर भूरे ह मुंगेली जिला म कोविड-19 के संक्रमण ल रोके बर बने काम करत हावयं। ओमन आदेश देहें हें के कोनो मनखे कहूं दूसर राज (देश या प्रदेश) ले आय होहीं त उमन ल आवश्यक रूप ले 14 दिन के होम आइसोलेशन म रखे जाही। ये आदेश जिला अउ विकासखंड स्तरीय आपदा प्रबंधन समिति ल पालन करे बर निकाले गए हे। जिला चिकित्सालय मुंगेली म अलग से बुखार खांसी अउ गला म खराश संबंधी समस्या वाले मरीज मन बर ओपीडी के संचालन करे गए हे, जेमा आवश्यक दवाई घलो मिलत हे। जगा-जगा चौक-चौराहा म पुलिस कोति ले सुरक्षा व्यवस्था करे जात हावय, के कोनो घर ले बाहिर झन घुमय। आवश्यक राशन अउ आन सामान के घर पहुँच सुविधा के घलो बिवस्था करे गए हे।
मुंगेली ले गुरतुर गोठ बर दिलीप बसंत
