शिक्षा ही जीवन के असल पूंजी: मुख्यमंत्री श्री साय

मुख्यमंत्री ह मुंगेली जिला ग्रंथालय म करिन अकतहा कुरिया के लोकार्पण
रायपुर, 20 मई 2025। मुख्यमंत्री श्री विष्णुदेव साय ह कहे हें के “शिक्षा ही जीवन के असली पूंजी ये। एखर बिना जीवन अधूरा हे। ये न केवल रोजगार के माध्यम हे, बल्कि पूरा विकास के आधार घलोक हे।” ओ मन आज बिहनिया मुंगेली जिला मुख्यालय म जिला ग्रंथालय म 29.90 लाख रूपिया के लागत ले बने अकतहा कुरिया के लोकार्पण कार्यक्रम ल संबोधित करत रहिन। ए बेरा म उप मुख्यमंत्री श्री अरुण साव, केंद्रीय राज्य मंत्री श्री तोखन साहू, मुंगेली विधायक श्री पुन्नूलाल मोहले अउर पूर्व सांसद श्री लखन साहू घलोक उपस्थित रहिन।
मुख्यमंत्री श्री साय ह कार्यक्रम म पढ़ईया लईका मन ले गोठबात करत आदर्श विद्यार्थी के पाँच गुण “काक चेष्टा बको ध्यानं, श्वान निद्रा तथैव च। अल्पाहारी गृहत्यागी, विद्यार्थी पंच लक्षणं के उल्लेख करत पढ़ईया लईका मन ल अनुशासित, मेहनती अऊ लक्ष्यनिष्ठ बने के प्रेरणा दीन। एक छात्र ले सोशल मीडिया के प्रभाव उपर पूछे गए सवाल के उत्तर म उमन कहिन, डिजिटल युग म अच्छाई ल अपनावव अऊ बुराई ले दूर रहव। श्री साय ह अपन छात्र जीवन के संघर्ष साझा करत बताइन के अविभाजित रायगढ़ जिला म शिक्षा के अवसर सीमित रहिस। नटवर स्कूल ही एकमात्र विकल्प रहिस। उमन पढ़ईया लईका मन ले समय के सदुपयोग करे, कभू निराश नइ होए अऊ परिश्रम ल अपन असली मंत्र बनाए के आह्वान करिन।
मुख्यमंत्री ह ‘प्रयास’ अऊ ‘नालंदा परिसर’ जइसे शैक्षणिक नवाचार मन के सराहना करिन अऊ कहिन के सरकार के लक्ष्य हे के हर जिला म आधुनिक ग्रंथालय स्थापित करे जाए। उमन मुंगेली जिला ग्रंथालय के सराहना करत बताइन के ये ग्रंथालय अब तक सैकड़ों युवा मन के सफलता के नींव बन चुके हे। उमन एला केवल अध्ययन के स्थल नइ मानके एक सफलता केंद्र बताइन। मुख्यमंत्री ह कार्यक्रम म कक्षा 10वीं अऊ 12वीं के बोर्ड परीक्षा मन म उत्कृष्ट प्रदर्शन करइया पढ़ईया लईका मन ल स्मृति चिन्ह अउ प्रशस्ति पत्र देके सम्मानित करिन। ए मौका म मुख्यमंत्री ल तोप सिंह कुंभकार ह ऊंखर हाथ ले बने छायाचित्र अउ भगवद् गीता अऊ आन स्मृति चिन्ह घलोक भेंट करिन।
जानबा हे कि जिला ग्रंथालय म अभी हाल म इहां 4780 ले जादा पुस्तक के संग्रह, 893 पंजीकृत सदस्य, 32 टेबल, 11 सीसीटीवी कैमरा हे। कार्यक्रम म राज्य के मुख्य सचिव श्री अमिताभ जैन, मुख्यमंत्री के सचिव श्री पी. दयानंद संग कई वरिष्ठ प्रशासनिक अधिकारी, शिक्षकगण अउ बड़ संख्या म छात्र-छात्रा मन उपस्थित रहिन।