मुंगेली के 90 स्कूल म बनही आधुनिक बालिका शौचालय

CHHATTISGARHI NEWS: मुंगेली, ग्रामीण इलाका के बालिका मन ला सुरक्षित अउ सम्मानजनक शैक्षणिक माहौल देहे के दिशा म मुंगेली जिला प्रशासन एक महत्वपूर्ण पहल करे हे। विकसित भारत रोजगार एवं आजीविका गारंटी मिशन (वीबी-जी-राम जी) के तहत जिला के 90 शासकीय स्कूल मन म बालिका शौचालय बनाय बर कुल 3 करोड़ 87 लाख रुपिया के प्रशासकीय स्वीकृति मिले हे। हर स्कूल बर 4.30 लाख रुपिया स्वीकृत करे गे हे।
जिला के कई ग्रामीण स्कूल म बालिका शौचालय के सुविधा नइ रहिस, जेकर से किशोरावस्था के छात्रा मन ला परेशानी होवत रहिस। शौचालय बने के बाद छात्रा मन ला स्कूल परिसर म सुरक्षित, साफ-सुथरा अउ सम्मानजनक सुविधा मिलही। एकर ले स्कूल म छात्रा मन के नियमित उपस्थिति बाढ़ही, पढ़ई म निरंतरता आही अउ स्वास्थ्य-सफाई संबंधी दिक्कत कम होही।
निर्माण काम ग्राम पंचायत अउ संबंधित एजेंसी मन के माध्यम ले कराए जाही। जिला प्रशासन कोति ले निर्माण म तकनीकी मानक अउ गुणवत्ता के पालन करत तय समय-सीमा म काम पूरा करे के निर्देश देहे गे हे।
ए योजना ले ग्रामीण इलाका म रोजगार के अवसर घलो बनही। निर्माण काम म स्थानीय श्रमिक मन ला रोजगार मिलही अउ मजदूरी के रकम सीधा उंकर बैंक खाता म जमा करे जाही। एकर से स्थानीय अर्थव्यवस्था ला मजबूती मिलही।
कलेक्टर कुन्दन कुमार ह कहिन के बालिका शौचालय केवल आधारभूत सुविधा नो हे, बल्कि बालिका मन के गरिमा, सुरक्षा अउ शिक्षा बर अनुकूल वातावरण सुनिश्चित करे के महत्वपूर्ण कदम हे। उमन निर्माण काम ला गुणवत्ता अउ निर्धारित मानक के मुताबिक तय समय म पूरा करे के निर्देश देहे हें।