मुंगेली ले दिलीप बसंत, जिला हॉस्पिटल मुंगेली मं अब बने इलाज होए लगे हे। एकर ले पहिली गांव के गरीब मनखे इलाज खातिर प्रायभेट हॉस्पिटल के चक्कर काटत तन धन अउ मन से खोखला हो जात रहिन। कई पईत तो अइसन हालत हो जाय के बीमार मनखे के पइसा के संगे-संग जान तको गवां जाए।
जिला बने के बाद नवा जिला अस्पताल बिल्डिंग रामगढ गाँव तीरे बने हे, मेन रोड़ से अस्पताल करीबन 1-2 किलोमीटर दुरिहा हे। ये अस्पताल आजकल मरीज मन बर वरदान साबित होवत हे। ये अस्पताल म महिला विशेषज्ञ, लइका विशेषज्ञ, दवई विशेषज्ञ, हड्डी विशेषज्ञ, दांत विशेषज्ञ, सर्जन, नाक कान गला विशेषज्ञ, एनेस्थीसिया, पैथालाजिस्ट अउ कई झन डाक्टर सेवा देवत हें। इहां ले लाभान्वित जनता मन के कहना हे के अब ये अस्पताल के सही रिजल्ट घलोक आवत हे। दिनो-दिन इहां मरीज के भीड़ बाढ़त हे। अस्पताल के डाक्टर मन सहित अस्पता के पूरा कर्मचारी घलव सेवा समर्पण से मरीज मन के सेवा करत हें। बताये जात हे के इहां कई झन मरीज के गंभीर आपरेसन कर के उंखर जान तको बचाए गए हे।
