अपन भुइयां म पांव रखत होईन गदगद
मुंगेली 12 मई 2020// श्रमिक स्पेशल ट्रेन द्वारा गुजरात के राजधानी गांधी नगर (अहमदाबाद) ले बिलासपुर रेल्वे स्टेशन पहुॅचे मुंगेली जिला के विकास खण्ड लोरमी ले गांव चंदेली ले श्रमिक श्री रामा, गांव मारूकापा ले श्री लालचंद अउ श्रीमति ललिता ह बताइन कि घर ले लगभग एक हजार किलो मीटर दूर काम करत जब कोरोना शब्द पहली बखत सुनिन त ज्यादा कुछ समझ नई आइस । फिर लाॅकडाउन होइस अउ सब कुछ बंद होय लगिस । ये देखके थोडकुन घबराहट होइस, काबर कि ये सब एखर पहले कभों जीवन म नई देखे रहेंन। जेमेर काम करत रहेंन, वही रहके दिन गुजारत रहेंन। जतका पैसा हमन कमाय रहेंन धीरे-धीरे खतम हो गे रहिस। गुजरात ले अपन गांव आय बर न कोई साधन रहिस, न ही पैसा रहिस, मन व्याकुल होय लगत रहिस। यही ख्याल आवय कि कभों अपन घर वापस पहुॅच पाबो की नही। ऐसन समय म छत्तीसगढ़ के मुख्यमंत्री श्री भूपेश बघेल ह वापस घर आय बर विशेष ट्रेन के व्यवस्था करके हम जैसन श्रमिक के प्रति उपकार करिन । मुख्यमंत्री के उपकार ल भुलाय नई जा सकय।
श्रमिक श्री रामा , लालचंद अउ श्रीमति ललिता घलो बताइन कि ओमन सब्बो रोजी-रोटी खातिर गुजरात राज्य गे रहिन। ऊंखर द्वारा रोज रोजी-रोटी बर काम करे जात रहिस। ऐसन समय मे कोरोना वायरस के संक्रमण ले बचाव बर लाॅकडाउन के घोषणा होय ले काम धन्धा बंद होगे।पैसा नई रहिस त ठीक समय मे प्रदेश के संवेदनशील मुख्यमंत्री श्री बघेल ह श्रमिक स्पेशल ट्रेन शुरू करके श्रमिक खातिर उपकार करिन । आज बिलासपुर पहॅुचेे हन अउ ईहां के कलेक्टर डाॅ. सर्वेश्वर नरेंद्र भुरे के अगवाई म जिला के टीम ह ओमन ल रिसीव करिन अउ स्वास्थ्य जांच कराय गिस। अपन भुइयां म पांव रखत ओमन गदगद हो गिन । एखर बर मजदुर मन मुख्यमंत्री के प्रति आभार व्यक्त करिन अउ मुख्यमंत्री ह सही समय म ट्रेन के व्यवस्था करके घर वापसी के रसता आसान करिन।
मुंगेली ले दिलीप बसंत
