विकास खण्ड पथरिया के 71 ग्राम पंचायत म 7 हजार 558 कमइया मनखे ल मिलत हे रोजगार
मुंगेली 17 अप्रैल 2020// लाॅकडाउन के बेरा म मुंगेली जिला म कुछ समय बर बंद महात्मा गांधी राष्ट्रीय रोजगार गारंटी योजना के काम अब चालू हो गे हे। ये योजना म काम बुता चालू होय ले जरूरतमंद लोगन मन रोजगार के चिंता से मुक्त हो गे हें। अब मनखे बर रोजी मजदूरी के रोजगार उपलब्ध होवत हावय। कलेक्टर डाॅ. सर्वेश्वर नरेंद्र भुरे साहब ह जिला के जरूरतमंद लोगन बर रोजगार उपलब्ध कराय के माकुल व्यवस्था करे गे हे। जेखर तहत जरूरतमंद लोगन ल ओमन के मांग के अनुसार बडे रूप म रोजगार मूलक काम स्वीकृत करे गे हावय। एही कदम म जिला के विकास खण्ड पथरिया के 71 ग्राम पंचायत म दो करोड से जादा रकम के नव तरिया डबरी निर्माण, तरिया डबरी मरम्मत, नाली निर्माण, डबरी निर्माण गोरुवा शेड जैसन निर्माण काम पास करके 7 हजार 558 मजदूर मनखे ल रोजगार उपलब्ध कराय जावत हे। जनपद पंचायत पथरिया के मुख्य कार्य पालन अधिकारी श्री कुमार सिंह घृतलहरे ह बताइन कि महात्मा गांधी राष्ट्रीय रोजगार गारंटी योजना म स्वीकृत अउ निर्माणाधीन काम लाॅकडाउन के बेरा म कुछ समय के लिए रोके गे रहिस हे। अब ये योजना म निर्माण अउ विकास काम फिर से चालू हो गे हे। लोगन मन ल अपन मांग के अनुसार रोजगारी बुता दिलाय जावत हे । सांथ म सोशल डिस्टेसिंग के नियम ल पालन घलोक कराय जावत हे। कमइया मनखे ल मास्क देय जावत हे अउ सेनिटाइजर के उपयोग घलोक करत हांवय।
मुंगेली ले गुरतुरगोठ बर दिलीप बसंत
